Manchester United chuan kar tawp hian Premier League inkhelah Craven Cottage-ah Fulham an tlawh dawn a. United head coach Michael Carrick chuan an midfielder lak thar Carlos Baleba leh defender Luke Shaw te chu he match-ah hian an rawn inlan theihna hunṭha (chance) an nei ve ve tih a nemnghet.
Kum 22 mi Baleba hian a club hlui Brighton & Hove Albion-a pre-season training an ṭan tirh te aṭanga a kerek hliam tawrh vanga chawl char charin, tun season bul a hmang ṭha thei lo a ni. Kum 31 mi Shaw erawh chu season bul ṭan match thuma a inlan hnuah, a malpui hliam vangin inelna hrang hrangah match thum a chawl tawh thung. Mahse an pahnih hian khualmuala inkhel tur squad-ah hian koh theih dinhmunah an ding ve ve tawh a ni.
Zirtawpni khan Carrick chuan an pahniha dinhmun sawiin: "An pahnih hian inkhelh theihna chance chu an nei ve ve a. Za a za (100%) inpeih sa chu an la ni chiah lo na a, beiseina erawh a awm ve hle a ni. Hun reilote chhung inenkawl an ngai a, he inkhel tur thlira buatsaih an ni a, kar tawp a lo thlen hunah Shaw-a dinhmun pawh kan hre chiang zual ang," tiin a sawi.
Baleba hi season liam ta tawp nia Brighton tana United a hmachhawn hnuah match a la khel leh miah lo a, west London-ah hian a inlan a nih pawhin substitute aṭanga rawn luh tir mai a rinawm. Tun kar khan training a zawm leh tawh a, Nilainia Carabao Cup-a a club hlui Brighton an hmachhawn ṭum pawh khan Old Trafford-ah inkhel a lo thlir ve nghe nghe a ni. Shaw pawh hi Everton nen 2-2 a an inhnehtawk ṭuma Benjamin Sesko-a goal thun tur a siamsak hnua a inlan loh aṭangin kar hnih a tling ṭep tawh a ni.
Ivory Coast winger Amad erawh chu tun thla tawpa Africa Cup of Nations qualifiers khel tur ram squad-ah pawh koh a nih loh avangin, international break hmaa a rawn kir leh chu a rinawm meuh loh. Pre-season training kar hnuhnung berah a kerek a tihliam avangin thla khat dawn khelmual a chhuahsan tawh a, inenkawl nan kar thum dang a la mamawh hmel a ni. Carrick chuan, "Amad hi chu a la hnai chiah lo a, ni reilote chhungin a rawn kir hman dawn lo. Kar a kal zel ang a, a dinhmun kan thlithlai zel ang," a ti a. October 10-a Old Trafford-a Tottenham Hotspur an mikhual hunah a rawn kir theih beisei a ni.
Manuel Ugarte pawhin international break chhung hian ram tana chhuak lovin Carrington lamah a khup hliam a enkawl chhunzawm dawn a ni. Uruguay international hian kumin nipui World Cup-ah khan a khup ti hliamin July thla lai khan zai a ni a, season tawp hmain a rawn inlan leh theih beisei a ni a, mahse thlasik ral hma chuan a rawn kir dawn lo thung.
Defender Matthijs de Ligt pawh kumin nipuia a hnungzang hnuailam an zai hnuah training a zawm ve leh tawh a, mahse inkhel tur erawh chuan a la inpeih lo. Carrick chuan: "Matta chu a rawn inbuatsaih ve leh mek a, engtikah chiah nge a rawn kir dawn tih hun bithliah fel tak siam ka duh rih lo," a ti. De Ligt leh pre-season friendly-a a hamstring ti hliam veteran goalkeeper Tom Heaton te pawh hi October 10-a Tottenham an mikhual hunah an rawn kir theih a beiseiawm a ni.
