Pathiannia Aston Villa nen 4-4 a an inhnehtawk hnu pawhin, Manchester United head coach Michael Carrick-a dinhmun chu a la derthawng hle a, chawlhkar tlemte chhung chu a hmakhua a la chiang lo viau dawn a ni.

Thla liam ta khan Champions League-ah Como laka 4-1 a an tlawm bakah Premier League-ah Bournemouth laka 3-0 a an chak loh hnu khan, he Red Devils manager hi Old Trafford aṭanga ban mai tur anga sawi a lo ni tawh a ni.

October 26 khan United hotute chuan he buaina chungchangah hian crisis meeting an nei a, Carrick hi vawi khat dang chhan leh rih thutlukna an siam a ni. Mahse, international break inṭan hma match pathum khelh tur awmah an inkhelh dan leh score siam dan tihmasawn ngei ngei turin an ti thung.

Heng match thum zingah hian Chelsea 2-0 a an hneh loh ṭumin bul an ṭan ṭha lo hle a, he match-ah hian second half-ah Lisandro Martinez-a'n red card a hmuh avangin United tan match a harsa lehzual a ni. Hemi hnuah Champions League-ah Roma an hmachhawn a, half-time-ah 2-0 ngawta an hnufual avangin Carrick-a tan a hmun a derthawng takzet a, mahse thapui thawha an rawn kir leh hnuah 3-2 in hnehna pawimawh tak an chang ta a ni.

Hemi a nih tak avang hian Unai Emery-a enkawl Aston Villa nena an match khelh tur chu Carrick-a hmabak hriltu ber a rawn ni ta a. United hi vawi hnih ngawt goal hnihin hnufual mah se, ṭan an lak thar leh avangin a tawpah 4-4 in an inhnehtawk ta a ni. International break hmain match thum aṭangin vawi khat an chak a, vawi khat inhnehtawkin, vawi khat an tlawm a; United hotute hian Carrick-a hnuaiah hmasawnna hmuh tur a awm tawk em tih chu thutlukna an siam a ngai ta a ni.

Carrick-a'n club hi a chhuahsan a nih taka a thlaktu ni thei tura United hotuten an ngaihtuah theih tur thlan tur hrang hrangte:

- Mauricio Pochettino: United manager hna chelh tur hian a tir aṭangin lo ngaihven tawh a ni a, mahse thlan a lo ni ngai lo. Report tarlan danin US national team enkawl mek Pochettino hian United zawm tur a nih chuan a hna hi chhuahsan a inhuam hle nia sawi a ni.

- Eddie Howe: Player pawimawh tak tak a chan hnuin kumin nipui khan Newcastle United a chhuahsan a. Ineos lamin he English head coach hi an ngaizawng hle a, United enkawl theihna hunṭha hi a hnar phal an ring lo a ni.

- Julian Nagelsmann: Germany leh Bayern Munich head coach hlui Nagelsmann-a'n hi chuan United manager hna hi a ngaihven loh thu lo sawi tawh ṭhin mah se, Carrick-a'n hmun a chhuahsan a nih chuan a rilru a thlak mai pawh a beiseiawm a ni.

- Antonio Conte: Thla liam ta khan club hrang hrang nena inbiakna an nei anga sawi chu Conte hian a pha a ni. Mahse tlachhe mek club lian enkawl a duh thu a lo sawi tawh a, Old Trafford club hi chutiang taka dinhmun hniam rawn thleng an nih avangin a mil em em a ni.

- Unai Emery: Aston Villa manager Emery hi United tan chuan suangtuahna manager (dream appointment) dik tak a ni ang. Mahse Villa aṭanga lakluh tur chuan sum tam tak sen a ngai dawn a ni. Pathiannia 4-4 a an inhnehtawk hnu pawh khan Emery hi a thlaktu ni thei dang zawng aiin thlan tur ṭha ber a la ni reng a ni.