Inrinni khan Old Trafford-ah Manchester United chuan point table mawngphah lama awm Tottenham Hotspur chu 1-1 in an inhnehtawkpui a, inkhelh tawpah mual chhung mipui lamin lawm loh lantirin an lo au el (boo) hial a ni.
He inkhelah hian minute 73-naah Bryan Mbeumo chuan United tan hma a hruaipui a. Hemi hnu minute nga lekah Luke Shaw nena an inbakkaih avangin Spurs midfielder Rodrigo Bentancur chu hnawhchhuah (red card) a ni zui bawk. Mahse, mual lakah player tam zawk nihna nei chung leh Tottenham-in season bul an ṭan chhiat em em lai pawhin, United hian chakna point thum an hum zo ta lo a; minute 92-naah Dominic Solanke chuan Spurs tan tauh lutin an siphurh a rawn sut ta hlauh a ni.
He result vang hian United chuan tun season Premier League-ah match khat chauh hnehna an la chang a, an match hnuhnung pali khelhah vawikhat mah chak an nei ta lo a ni. Manchester United full-back hlui Gary Neville chuan hetianga Carrick-a naute an chetdan chu a hmuh liam mai mai theih tawh loh thu The Gary Neville Podcast-ah a sawichhuak a ni.
Neville chuan team pum chet dan sawiselin, "Tlan an tlan tawk lo a, luhlulna, tumruhna leh beidawng lo rilru an pholang tawk lo a ni. Mipui au el ri khan an thil en mekah an beidawn tawh zia a tarlang chiang hle. Tun dinhmuna kan thil hmuh mek chu team zangthal der, inkhawmkhawm hleithei lo an nih bakah, an zinga ṭhenkhat tan chuan he club hi a lian mah mah tawh niin a lang," tiin a sawi.
Head coach Michael Carrick-a awmdan pawh kawk chhuakin Neville chuan, "Carrick-a lu thing khan... 'keima tan an khel meuh em? Engthil nge he mite lakah hian thleng ta? An inrintawkna an hloh em ni? An rilru an pe tawh lo zawk nge ni a, tual an thlah mai dawn em ni? Eng nge thleng mek? Season liam taa ka thawhpuite kha an ni tawh lo hrim hrim,' a ti a nih hmel. Minute 20 chhung ngawt camera-in Michael Carrick an lak lai khan a lu a thing a, a mitmeng thuk tak aṭang khan a manganna a hmuh theih a ni. A ngaihtuahawm takzet a ni," tiin a sawi zui bawk.
Tlar lailia khel Tielemans leh Mainoo te chungchangah Neville chuan, "Tielemans leh Mainoo hi chu kan hmu hnem tawk tawh niin ka hria. Tihtawp nghal hmiah chu thil khauh lutuk a ni mai thei a, mahse he football club-a Premier League khel tur chuan an che rang tawk lo (dynamic tawk lo) a ni tih ngaihdan siam nan chuan ka hmu tawk tawh hle. Player ṭha tak ve ve chu an ni meuh mai, mahse a chang chuan an inrem lo a, an inkawp fuh lo ṭhin a ni. Carlos Baleba a rawn luh khan tha leh chakna a rawn thlen zawk a; a bak zawng pawh hian an inthunun a ngai tawh a ni," a ti.
Champions League match khirh tak an hmachhawn tur chungchangah Neville chuan vawrh zuiin, "Thawhleh zanah Madrid an hmachhawn dawn a, tha leh phurna in neih loh chuan eirawngbawl in ni nghal mai ang. Hma an sawn a ngai a, an theihna a la awm bawk. Vawiina an khelh aia ṭha fê hian an khel thei a ni—Amad, Mbeumo, Cunha leh Bruno Fernandes te pawh an aia ṭha an ni. Kar thum chawlh kha inbuatsaih tharna hun a ni a, ni 28 chhungin match riat zet an khel dawn a, Madrid an hmachhawn hnuah Pathianni lehah Elland Road-ah an kal lehnghal dawn bawk. Minute khatna aṭanga phurna leh tha nena khel tur khan ka beisei a ni. Football-ah chuan draw leh defeat te chu a awm thei, mahse kan draw dan leh kan tlawm dan hi a pawimawh ber a ni," tiin a tlip a ni.
