May thlaa a ngheta Manchester United head coach hna a chelh aṭanga thla nga leh ni khat a liam ta hnuah, Michael Carrick-a dinhmun chu a derthawng hle a, ban mai theih dinhmunah a ding mek a ni.
Nikum season chawhnu lama a chet ṭhat pui ang khan tunah chuan a player-te a chhawr ṭha thei tawh lo a, an che chhe hle a ni. Player-ten a thil zirtir an zawm zui tak tak lo va, an captain berin mipui hmaah tactics chungchang a sawisel tak bawk avangin Carrick-a tan Old Trafford-a a hun hmabak a thim hle.
Como laka an tlawm chhiat hnuah pawh United hierarchy chuan hun ṭha an la pe rih a, mahse hetianga chet chhiat chhunzawm reng hi an remti dawn lo a ni. Chuvang chuan Pathiannia AFC Bournemouth nena an inkhelh tur hi Carrick-a tan chuan a chak ngei ngei ngai (must-win) match a ni ta a ni.
Carrick-a thlaktu tur hming pawh chanchinbu lamin an tarlang ṭan a, bet siamtute phur pui ber chu Chelsea manager hlui Antonio Conte a ni. Premier League leh Serie A title vawi nga lo chawi tawh a nih avangin Conte hi mi hlawhtling tak a ni a, Old Trafford pan pawh a hreh lo hle. Mahse Tottenham-a a awm lai pawha a player-te 'rochan' (selfish) ti mi Conte hi buaina nei tel zel ṭhin a ni bawk.
Inter Milan-a Conte-a hnuaia lo khel tawh ṭhin Ashley Young chuan he Italian manager hi United tan a remchan loh tur thu a sawi chhuak nghe nghe. Young chuan, "Inter-ah a hnuaiah ka lo khel tawh a, a pui tlat a ni. Khelmual sirah chuan Diego Simeone nen an inang hle a, a ṭawng char char ṭhin. Tlawm kan neih phei chuan match zawhah meeting thui tak kan nei a, darkar thum emaw li emaw zet inkhawm pui kan nei ṭhin. Manchester United player-te hi an tlan peih lo a nih chuan, Antonio Conte a rawn luh hi chuan thil duhawm lo tak a thleng ang," tiin a sawi.
Ineos hian kum 2028-a Premier League champion nih tura ruahmanna sei tak an siam avangin, club danga rei awm ngai lo Conte hi he ruahmanna thliarah hian a zep a harsa dawn a ni. Conte-a enkawl Tottenham squad leh tun United squad-te hi an mizia a inang hle bawk.
Chuvang chuan Carrick ban ngawt hi buaina chhanna a ni vek lo. Ralf Rangnick-a'n a lo sawi tak 'squad siksawi vek' (open heart surgery) pawh hi zawh a nih si loh chuan, manager thar rawih ngawt pawhin awmzia a nei thui dawn lo. Board lamin transfer bazar-ah sum tam tak senga inthuam ṭhat an inhuam lo a nih chuan, manager thar rawih pawh hi buaina chhanna a ni tak tak dawn lo a ni.
