Manchester United chuan an academy goalkeeper tha Will Murdock chu hun rei zawk atan contract thar an ziahpui hnu lawkah, senior football khelhna hunṭha a neih theih nan loan-in an chhuahtir ta.
Kum 19 mi goalkeeper hian kum thar January ni 5 thleng daih turin National League North club Hednesford Town hi a zawm a, hei hi senior football huanga a vawikhat chhuahna tur a ni. Club official website chuan thuchhuah siamin, "Manchester United goalkeeper Will Murdock chuan youth loan move a tifel ta a ni. Kum 19 mi hian Reds nena contract thar an ziah zawh chiah hnuah, January ni 5 thleng daih turin Hednesford Town hi a zawm dawn a ni," tiin an puangzar a ni.
He tlangval hian Hednesford Town-ah hian Southampton goalkeeper hlui Kelvin Davis-a kaihhruaina a dawng dawn a, chanchinbu lamin an tarlan danin vawiin hian FA Cup second qualification round-a Coventry United an hmachhawn turah Murdock hi bul a ṭan nghal maithei bawk a ni.
Tun kar chhung khan United academy lamah boruak a rit deuh a, an rawlthar ngaihsan hlawh tak JJ Gabriel-a'n club chhuahsan a dil thu a darh kha a ni. Mahse United hotute chuan he thil hi rang taka chhang letin, an academy naupang theihna nei ṭhate chu thlung nghet turin hma an la nghal zung zung a. Noah Ajayi chuan contract thar ziah a hnaih hle nia hriat a nih laiin, Red Devils hian Will Murdock bakah Fred Heath leh Dante Plunkett te hnenah professional deal thar an pe fel tawh bawk a ni.
Murdock hi kum 2025-a Manchester United-in FA Youth Cup semi-final an thlen theih nana player pawimawh tak a lo ni tawh a, khami ṭum khan Aston Villa lakah an tlawm a nih kha. Season liam ta khan Youth Cup-ah Cameron Byrne-Hughes lakah a hmun a chan hman deuh na a, beidawng lovin hma a sawn chhunzawm zel a, Under-21 squad-ah pawh a inhlangkai thei ta hial a ni.
Tun season-ah pawh khan Under-21 tan vawikhat a inlan tawh a, thla liam ta tawp lama Leicester City 4-1 ngawta an sawp ṭum khan khelmualah minute 90 chhung a khel tluan thak a ni. Club piah lamah ram aiawh lamah pawh sulhnu ṭha tak nei chho mekin, Northern Ireland tan under-16, under-17, under-18 leh under-19 level-ah te a lo inlan tawh bawk a ni.
United academy-a kum eng emaw zat a awm chhunga level hrang hrang paltlang tawh Murdock tan chuan, he loan hi puitling khelmuala theihna phochhuah theihna hunṭha leh tawn hriat hlu tak a ni dawn a. League match harsa leh innuai na tak National League North-a inkhelh tam a, Kelvin Davis-a hnuaia a theihna tihhriam chu Carrington lama a kir leh huna a chhawr ṭangkai tur zinga mi a ni ngei ang.
