Pathianni hian Manchester United chuan Craven Cottage-ah Fulham an tlawh dawn a, he inkhelah hian dugout-a awm tur manager pahnihte ve ve hian pressure sang tak an hmachhawn mek a ni. International break neih a nih dawn avangin, Michael Carrick-a tan phei chuan tlawm chunga chawlh hmachhawn chu thil duh loh tawpkhawk a ni ang.

Tun season an ṭan aṭangin Red Devils hian match ruk an khelh tawhah vawi hnih chauh hnehna an la chang a, Nilaini zan khan Brighton lakah 3-2 a an tlawm tak avangin Carabao Cup third round aṭangin an tla fel der tawh bawk. Amaherawhchu, Fulham lam dinhmun pawh a ṭha chuang bik lo va, a zawnin match hnih chhung an tlawm hnuah Carrick-a naute tan hian point thum hlawhchhuah lehna hunṭha tak a inhawn phah a ni.

He inkhelah hian United chuan an kawr thar, Adidas trifoil pawl (blue kit) chu an ha dawn a ni. Hei hi club thil hlun zui tlat ṭhinte tana pawm harsa tak a ni ang, a chhan chu Craven Cottage mualah United hian a vawikhat nan kawr sen ha lovin an inlan dawn tlat a ni. Fulham hian an kawr pangngai a var leh a dum inpawlh an hak dawn miau avangin, United hian an jersey sen pangngai chu ha thei reng an nih laiin, sumdawnna lama an jersey thar hralh pun an duh vang zawka ha tur an ni.

Fulham lam pawh kar liam ta chhung khan Liverpool lakah point khat an hlawhchhuak a, Carabao Cup-ah West Ham hnehin hma an sawn ve bawk a, mahse Premier League match li an khelh tawhah vawikhat mah an la chak lo thung. Khelmual neitu Fulham record hi a chhe hle a, mahse United pawh hian tun season league-ah vawikhat chiah hnehna an la chan ve tho avangin Carrick-a tan tlawm ngaihna a awm tawh lo a ni.

Manager thar Alvaro Arbeloa chuan Marco Silva-a hmunruak luahin Fulham hi a enkawl ṭan a, mahse match li aṭangin point khat chiah an la hmu a, an tlarhnung a phui lo hle bawk. United hian Craven Cottage-ah record ṭha tak an nei a, he muala Premier League match 20 an khelh tawhah vawi 12 ngawt hnehna an lo chang tawh a, kum 17 chhung zet Fulham hian mahni mualah United hi an la hneh lo a ni.

He inkhel hi Carrick leh Arbeloa te manager anga an inhmachhawn hmasak ber tur a ni a, mahse player an nih lai chuan an lo inhmachhawn fo tawh ṭhin. Arbeloa hi Liverpool leh Real Madrid-a a awm lai khan Carrick-a United nen hian an lo innuai fo tawh a, player an nih laia an inhmachhawn ṭumah khan Arbeloa hian vawi thum hnehna changin Carrick hian vawi hnih a chang ve thung a, Champions League-ah 1-1 in an lo inhnehtawk tawh bawk.

Zirtawpnia press conference an neihnaah Carrick chuan an player lak thar Carlos Baleba chu a kerek hliam aṭangin a damṭha chho tawh a, Fulham lakah hian a inlan theih maithei thu a sawi bawk. Kum 22 mi he Cameroon midfielder hian Brighton tana a khelh hnuhnun ber aṭangin thla li dawn a liam tawh avangin a match fitness erawh a la famkim kher lo vang. Craven Cottage-ah hian inlan thei dawn pawh nise bench aṭanga luh tir phawt a rinawm a, United tlarhnung venhim kawngah a thawhhlawk nghal a beiseiawm hle a ni.