Manchester United defender hlui, hliam vanga hun rei tak khelmual chhuahsan hnua theihnghilh zui tak Tyrell Malacia chuan kumin nipuia Old Trafford a chhuahsan hnuah, Major League Soccer (MLS) club FC Cincinnati chu a zawm fel ta. Kum 2022-a Dutch club Feyenoord aṭanga United zawmtu left-back hian Manchester-ah kum li chhung hun a hmang a ni.
Malacia hian United States lamah a career bung thar a hawng dawn ta a. Cincinnati nena an inremnaah hian kum khat daih contract a ziak a, 2027/28 Major League Soccer season thleng pawhsei theihna (option) a tel bawk tih Zirtawpni khan he club lam hian an nemnghet a ni. He Dutch full-back hian kar liam ta khan he team-ah hian trial a lo nei tawh bawk a ni.
Cincinnati general manager Chris Albright chuan club website hnenah Malacia an lalut thei chu an phur thu sawiin, "Tyrell-a theihna leh tawn hriat ang nei player kan squad-a kan lalut thei hi kan lawm hle a ni. Football inelna sang ber bera lo khel tawh a ni a, hetiang dinhmuna khelh dan phung leh a mamawh chu a hrechiang em em a ni. Ball a khawih thiamna te, tlarhnung venhim lama a theihna leh team dah pawimawh hmasak mi a nihna hi kan team tan thil lawmawm tak a ni a, Cincinnati-a a lo lut hi kan hlim takzet a ni," tiin a sawi.
Kum 2022 khan United hian Feyenoord aṭangin Malacia hi £13million vel sengin an la a, khatih lai khan Luke Shaw-a hmunruak luah zui thei tur atana ngaih a ni nghe nghe. Mahse, Old Trafford-a a awm chhung hian a khupah hliam na tak vawi hnih ngawt a tawrh avangin a kalsual ta hlauh a ni. A khup hliam zai vawi hnih ngai hian thla 18 zet khelmual a chhuahsantir a, a chet ṭhat theihna a tithuanawp nasa hle a ni.
Kum 2025 tir lam khan a theihna leh a fitness siamṭhat leh tumin Dutch club PSV lamah loan-in a chhuak a, he inremnaah hian a ngheta lei theihna (option to buy) a tel bawk a ni. Hemi hma hian Portugal club Benfica pawh zawm tura inbiakremna nei tawh mah se, club hnihte inkarah season tawpa a lei chhuahna man chungchangah inremna a fel theih tak loh avangin he transfer hi a ṭhulh leh ta a ni.
United-ah hian 2025/26 campaign atan a kir leh a, November thla aṭang khan match riatah a inlan ve hman a. Mahse, match ruk bul a ṭan zinga match nga-ah chuan half-time (chawlhlawk)-ah lakchhuah a ni ziah thung. Old Trafford-a kum li a awm chhung khan Malacia hian inelna hrang hrangah match 50 chiah a khel hman a, 2025/26 season chhung phei kha chuan Premier League-ah hun tawp lam substitute-in vawi thum chauh a inlan a ni.
Manchester a chhuahsan hnuah he defender hian United-a a hun hman liam tawhte chu a hlut hle thu a sawi chhuak a. ESPN hnena a sawinaah Malacia chuan, "Khatih chhung khan thil mawi leh duhawm tak tak ka tawng a, thil duhawm lo deuh pawh ka tawng bawk. Club lian lutuk tana khelh theihna hun ka nei kha ka lawm takzet a ni. Tunah erawh chuan ka hmabak lam chiah ka thlir tawh a, ka football nunah chuan he bung hi chu khar fel a ni tawh. Ka hlim a, eng nge lo thleng zel dawn tih hriat ka chak tawh hle a ni," tiin a tarlang.
