England captain kum 33 mi Harry Kane chuan kum 2023 khan Premier League club Tottenham Hotspur chhuahsanin Bayern Munich a pan a, he hun aṭang hian a football zinkawng chu a sang lehzual hle. Spurs captain hlui hian Bayern a zawm hnuah Bundesliga title vawi hnih a lakpui tawh bakah German Cup a chawi tawh a, club level-a nomawi chawi loh vanga a lo buai ve tawhna chu a titawp ta a ni.
Hun kal tawhah khan Manchester United chuan Kane hi Old Trafford-a lakluh tumin vawi eng emaw zat an lo sawizawm tawh ṭhin a, a bik takin £86.4m vel senga Bayern Munich-in an lakluh hma khan lak tumin an lo ngaihven hle a nih kha. Tottenham a chhuahsan hnuah Kane hian Bayern Munich tan match 153 a khelhah goal 150 zet khung tawhin a che ropui hle a ni. He Three Lions forward ngaihtuahtu zingah hian Red Devils chauh an ni lo a, Manchester City leh Real Madrid te pawhin he Bayern star hi lak tumin an lo ngaihven tawh ṭhin bawk.
Sir Alex Ferguson-a'n khelmual a chhuahsan hnuah, Kane-a'n Red Devils kawr ha ta se engtin nge an awm ang tih chu United ṭantute tan chuan suangtuahnaah a cham reng tawh dawn a ni. ESPN TikTok page nena an inkawmnaah, Kane hian a career chhunga khualmual (away stadiums) a khelh tawh zinga a rilru hneh ber khelmual pathum thlang chhuak tura an zawhna chu a chhang a. He Bayern striker hian hmun danga inkhelh a ngainat ber atan Manchester United mualpui Old Trafford chu a thlang hmasa ber a, chumi dawtah Newcastle United khelmual St James' Park leh Borussia Dortmund khelmual Westfalenstadion te a thlang zui bawk a ni.
Kane-a'n Tottenham-a hming a rawn chher chhoh lai kha Sir Alex Ferguson-a'n Manchester United a enkawl tawp lam kha a ni a. Mahse, he Spurs striker theihna hian Ferguson-a a chawlh hnu thleng pawhin a mit a la zui reng tho a ni. Kum 2021-a SPORTbible nena Gary Neville-a'n an kawmnaah, Ferguson chuan, "Kane hi player ṭha chungchuang a nih ka ring a ni. Dele Alli pawh kha player ṭha tak a nih chhoh ka ring a; mahse, a chungah eng nge thleng tih erawh ka hrethiam chiah lo a ni. Chuan Son [Heung-min] pawh kha, hengte hi player ropui tak an ni," tiin a lo sawi tawh a ni.
Ferguson-a'n Kane a ngaihhlut zia hi United player hlui ṭhenkhat pawhin nemnghetin, kum 84 mi Scotsman hian club la enkawl se chuan he striker hi a la ngei ang tih an sawi bawk. Kum 2025-a Football's Greatest podcast-a a sawinaah United striker hlui Teddy Sheringham chuan, "Season hnih liam ta chhung khan Harry Kane leh Declan Rice te hi lak theihin an awm ve ve a ni. Player ṭha chungchuang, entawntlak tak leh kar tin theihna sang lantir reng thei, professional ropui tak an ni a; mahse, anmahni lak tumna lamah United kha an inrawlh hnai lo hrim hrim a ni. Harry kha Bayern Munich pan an phalsak a; Arsenal-in Declan Rice an lak dawn pawh khan an lo chuhpui lo a nih kha. Sir Alex Ferguson-a hun lai khan hetiang player ṭha an chhuah theih meuh chuan, aman va chhuak ngeiin a va lei mai ṭhin a ni... Gary Pallister, Roy Keane, Paul Ince, Wayne Rooney te kha a va chhuak a, heng player ṭha lutukte hi a va lalut hmiah mai ṭhin," tiin a sawi chhuak hial a ni.
Kane-a'n United tana inkhelh theihna a nei ta lo leh Old Trafford khelmual a ngainat thu a sawi chhuak lehzel hian, Manchester United ṭantute thinlung a tina thar leh ngei ang le.
