Manchester derby-a inhnialna lian tak chhuahpuitu match-a VAR mawhphurhna latu Matt Donohue leh Blake Antrobus te chu referee hna aṭanga chawlhtir lailawk an ni ta. Pathiannia Old Trafford-a Manchester City-in 1-0 a an hmelma Manchester United an hneh ṭum khan, second-half-a Erling Haaland-a'n chakna goal a khung chungchangah he thutlukna hi siam a ni.
Chief Refereeing Officer Howard Webb leh an management team te chuan thutlukna siamin, international break zawh thleng tal chu heng referee pahnihte hi inkhelh an la chawlhtir rih dawn a ni. He thil hi on-field referee-in a tirah offside anga a lo pawm tawh hnuah, VAR lamin Haaland-a goal hi an pawmsak leh tak avanga thleng a ni.
Kha tih lai khan Josko Gvardiol-a cross chu pet tumin Enzo Fernandez chu offside position-ah a awm a, mahse ball a khawih loh avangin inkhelah a inrawlh lo angah ngaih a ni a; Patrick Dorgu-a ke phar chhuak avangin Haaland-a erawh onside-ah a ding niin an sawi a nih kha.
United defender Lisandro Martinez chu offside-a awm Fernandez leh a hnunga awm Haaland-a te inkarah a lo awm a. He Argentinian defender hian thutlukna siam danah a lungawi loh zia pholangin, Sky Sports-in an kawmnaah pawh a thinrimna thunun harsa a ti hle.
United head coach Michael Carrick pawhin he thil thleng hi a lungawi loh thu sawiin, referee-te thutlukna siam dan chuan a ti-mangang tak zet tih a sawi chhuak bawk a ni. A hmaa PGMOL tia hriat lar ṭhin Pro Ref chuan tihsual an neih thu (error of judgement) pawmin ngaihdam an dil zui ta a ni.
Pro Ref thupuangtu chuan, "Pathiannia Old Trafford-a Manchester United leh Manchester City ten Premier League match an khelh ṭuma minute 60-naa thil thleng chungchangah, Erling Haaland-a goal pawm a nih danah fiahna kan pe thei e. Khelmuala thutlukna hmasa chu Erling Haaland-a lakah offside a ni a; chu chu VAR-in a endik hnuah onside-ah a ding tih hmuhchhuah a ni.
"He attack-ah hian Enzo Fernandez chuan ball a khawih lo tih finfiah a ni a, chuvang chuan offside thil hi ngaihdan hrang awm theihna a ni. Chutih rualin, he hunah hian VAR chuan a awmna hmunin nghawng a neih theih dan a hmu thiam lova, referee chu screen hmanga enfiah (on-field review) tura hrilh tur a ni zawk. Tihsual lian tak a thleng a ni tih hriatpuiin zanin hian Manchester United chu biakpawh an ni tawh a. He thil thleng hi uluk taka enfiah nawn leh a ni ang," tiin a sawi.
Manchester derby-a lead VAR ni tu Donohue hi kumin season chhunga Premier League match thum a enkawl hnuah, kar tawp lo awm turah hian top-flight match enkawl turin dah a ni ta lo a ni. Hei bakah hian European-a inlan club te an tel ṭan dawn avanga Carabao Cup third round match pawimawh turah pawh a inlan a rem dawn lo bawk.
Premier League Match Centre chuan X (Twitter)-ah thuchhuah siamin, a tirah chuan VAR-in Haaland chu onside nia hriain goal an pawmtir thu leh Fernandez-a'n ball a khawih loh vanga goal pawm an nih thu an lo tarlang tawh a; mahse Chelsea midfielder hlui Fernandez-a'n tlarhnung tibuai tura a inrawlh ve dan an hmuhhmaih a ni tih pawmin referee thuneitute chuan an ngaihdan hmasa chu an thlak danglam ta a ni.
