Old Trafford-a Tottenham Hotspur nen 1-1 a an inhnehtawk ṭum khan, Manchester United manager Michael Carrick chuan mahni muala thleng ngai zen zen lo a hmachhawn a. First-half chhung zawng khan United player-ten ball an pet emaw an in-pass apiangin Old Trafford mipuite chuan an au el (boo) zui tluk tluk a ni.

A tlangpui thuin Old Trafford-ah hian team an chet chhiat lutuk pawhin half-time-ah emaw chauh fan-te hian an rilru natna an ti lang ṭhin a. Khelmuala inkhelh chhung zawnga mahni player-te ngei chutianga an au el chu thil thleng khat tak a nih miau avangin, match zawhah Carrick pawhin a rilru a nat (hurt) thu a pha lo a ni. He thil thleng chungchangah hian Manchester United defender hlui Gary Neville chuan a ngaihdan a sawichhuak a, Carrick-a dinhmun leh thil thlen chhan a hrilhfiah bawk.

Season liam ta khan United hian beisei aia ṭha zawka chein Champions League khel turin an tling a, fan-te pawhin beiseina sang tak an neih phah a nih kha. Mahse, tun season-ah erawh an che chhe chho leh hle a, fan-te beiseina neih pawh chu lungawi lohna leh beidawnnain a rawn thlak thleng ta a ni. Carrick-a mizia, khelmual sira thinrim buai ve ngai lo leh dam thluam ṭhin hian fan-te a tithinur lehzual a, team an khelh chhiat laia a inbengdaih lutukna chuan boruak a siamṭha zo lo a ni.

Spurs laka an inhnehtawk ṭum pawh khan United player-te hian Tottenham player-te aiin km 5 zetin tlan kual an nei tlem zawk a. Jamie Redknapp pawhin match tin deuhthawa United player-ten khelmual an tlan kual hneh tawk lo ṭhin chu sawiselin, an inpekna a tlem hle tih a lo tarlang tawh bawk.

Match apianga point an hloh zui zel avanga fan-te lungawi lohna pung chho hian mual chhungah au elna a thlen ta reng a ni. Mahse Sky Sports Gary Neville podcast-ah Neville chuan, Old Trafford mipuite au elna hi an manager Carrick-a laka an rilru puthmang vang a nih a la rin chiah loh thu a sawi thung.

Neville chuan, "Au elna (boos) hi Michael Carrick-a dodalna a nih ka la ring lo, mahse boruak hi a inthlak chak hle a ni. United fan-te hi mi rinawm tak an ni a, an manager leh player-te chungah hian rinawmna piahlam thlengin an ding ṭhin. Mahse tha thlahna, thawhrim tawk lohna leh taihmakna tlakchham hi chu an pawm thei thlawt lo a ni. Player-te hian tumruhna, beidawng duh lohna leh inbeihlet duhna rilru tawk an pholang lo a ni," tiin a sawi.

He au elna hi Carrick-a zawn bika tinzawn a la ni lo mai thei a, mahse player-te thawhrim tawk loh vang chauhva ngaih erawh thil dik famkim a ni lo. Inkhelh laia Carrick-a awmdan zawi lutuk hian result a ṭhat loh changin fan-te phurna a pe thei tawh lo a, chu chuan an lungawi lohna a puahkehtir ta bawk a ni. Tun season chhung hian Carrick-a'n substitution a siam chang pawhin fan-ten an lo au el zing tawh hle.

Khelmualah result ṭha a awm lai kha chuan Carrick-a mize dam tak hi thil mawi tak angin lang mah se, result a chhiat tak miau chuan chu mizia phenah chuan biruk reng theih a ni tawh lo. Tun dinhmunah au elna hi amah Carrick-a lakah chauh la fu lo mah se, khelh dan leh result an siamṭha thuai lo a nih chuan, chawlhkar lo kal turah manager hian he sawiselna phurrit zawng zawng hi a mawphurhnaah a la vek a ngai tawh ngei ang.