Brighton laka Manchester United tlarhnung chet chhiat em avanga sawiselna awm chungchangah, head coach Michael Carrick-a'n match khat lek vanga player-te laka thutlukna hmanhmawhthlak siam a tum loh thu a sawi. Carabao Cup third round-ah United-in Brighton laka 3-2 a an tlawm ṭum khan, tlarhnung laili (centre-back)-ah Leny Yoro-a leh Ayden Heaven-a te chu bul ṭantir ni mah se, an che sual hle a, tawnhriat an la neih tlem zia a lang chiang hle a ni.
United hian tun season-ah game ruk khelh tawhah goal 10 ngawt an chhuah tawh a, Champions League-ah Sabah an hneh ṭum chiah khan clean sheet an nei a ni. Carrick-a'n, "Kan duhthusam anga bul ṭanna a ni lo. Team angin hmasawn kan mamawh takzet a, hei hi tlarhnung leh goalkeeper-te chauh mawhphurhna a ni lo a, team pum anga kan chinfel tur a ni," tiin a sawi.
Yoro-a leh Heaven-a te chet chhiat chungchang zawhna chhangin, Carrick-a'n an pahnih hian bul an ṭan ṭha hle tih a sawi a, "Thil hrang hrang aṭangin an la zir zel dawn a, hmakhua eng tak nei player naupang pahnih an ni. Football-ah chuan hun ṭha leh hun harsa paltlang chang a awm ṭhin a, thil kal fuh lo aṭang hian zir tur a tam bik ṭhin a ni," tiin a player-te chu a chhan tlat a ni. Carrick-a mizia hian manager hlui Ruben Amorim-a mizia nen a inpersan hle a, Amorim-a khan Benjamin Sesko-a a talbuai thu leh Patrick Dorgu-a a phili ṭhin thute kha tlang takin chanchinbumite hmaah a lo sawi chhuak tawh a nih kha. Carrick-a erawh chuan chutiang thubuaite chu chanchinbu hmaah a sawi ve mai mai ngai lo.
United hian training-na hun an nei tam lo hle a, mahse mimal taka player-te zirtirna (individual coaching) erawh an la kalpui reng thung. United defender hlui pahnih Jonathan Woodgate-a leh Jonny Evans-a te chuan tlarhnung player-te hi mimal takin an zirtir deuh ber a, Carrick-a'n tactics leh game plan lam a enkawl thung a ni. Woodgate-a hi Carrick-a'n Middlesbrough-a a lo thawhpui tawh, a mi rin ber zinga mi a ni a, training-naah pawh tlarhnung zirtirna kawngah thurawn ṭha tak tak a pe ṭhin a ni.
Woodgate-a hian player naupangte dinhmun hi a hrethiam hle a, amah pawh kum 16 a nihin Leeds United a zawm a, hmun pawimawh a chan hnuah £9m ngawtin Newcastle-ah a lo insawn tawh a ni. Lille aṭangin United-in Leny Yoro-a chu £52.2m (add-ons £6.7m telin) in an lo la tawh a, tunah hian Old Trafford-ah a season thumna hmang mek tawh mah se, kum 20 chauh a la nih avangin hmanhmawh taka nawr chi a nih loh thu a sawi belh bawk.
Carrick-a'n, "Kum 20 chauh a la ni a, theihna sang tak a nei a ni. He club-ah hian hetiang rual hian centre-back khelh chu thil harsa tak a ni a, Leny leh Ayden te hian an thei ngei tih ka hria. Player ṭhenkhat chu kum 18-ah an che ṭha em em a, ṭhenkhat erawh kum 22, 23 emaw 24-ah te hma an sawn chho ṭhin a ni. Leny lakah hian beiseina sang tak kan nei a, hmasawn turin kawng dik a zawh mek a ni," tiin a sawi. Vawiin hian United-in Fulham an hmachhawn dawn a, Carrick-a tan hian chakna chan bakah clean sheet neih ngei chu an tlarhnung inrintawkna siamṭha turin a pawimawh hle dawn a ni.
