Manchester United star hlui Wayne Rooney chuan a fapa Kai Rooney chu footballer a nihna angin zir tur a tawp ngai lo tih a hrilh a ni. Rooney hian United-ah kum 13 a awm chhungin goal 250 chuang a khung a, a fapa Kai pawhin senior football hmachhawn turin bul a ṭan chho mek bawk.
England international hlui fapa kum 16 mi Kai hi United academy aṭanga rawn ṭhang chho niin, season liam ta khan hliam avanga a chawlh nual avangin Under-18 tana a inlan chhungin goal hnih a khung a. Old Trafford-a Derby County academy team an hneh ṭum khan FA Youth Cup-ah a debut a lo siam tawh a ni.
Wayne leh Kai te hi Disney Plus documentary thar 'The Real Rooneys'-ah an inlan a. A trailer-ah Wayne chuan a fapa hnenah, "Ka inkhelh hnuhnung ber thleng khan thil thar ka la zir zel a ni," tiin thurawn pawimawh tak a hlan a ni.
Football a chawlhsan hnuah kum 40 mi Rooney hian management leh punditry lamah hma a sawn chho zel a. Match of the Day-ah a inlan tam chho hle a, 'Can You Beat Wayne Rooney?' tihteh liau liau game show chhuah thar turah pawh a hruaitu ber atan a inlan dawn a ni.
Kai Rooney hi United academy team-ah striker angin goal khung mi tak ni ṭhin mah se, tun hnaiah mual sir lam (wide role) ah a khel chho zawk a. Al Hilal forward Gabriel Martinelli-a khelh dan zir a duh thu a sawi nghe nghe. TikToker Gabrielvpool nen an inbiaknaah Kai chuan, "Right wing-a ka khelh chuan Martinelli-a khelh dan chi hi ka ngaihtuah a, mahse striker a nihna zawk hi ka entawn ṭhin. Ball chelh reipui vak chi striker ka ni lo a, defender-te hnunga tlan luh zawk hi ka khelh dan a ni," tiin a sawi.
Hliam aṭangin a rawn dam chhuak leh tawh a, tun season-ah Under-18 tan thawhhlawk zawka inlan a inpeih leh ta a ni. Mahse rawlthar dang JJ Gabriel angin first-team training zawm phei tura chawilar a la ni rih lo.
Academy level-ah a fapa a che ṭha hle chungin, Wayne chuan Kai-a chungah pressure siam tam a duh lo a, ama puitlin dan hmang ngeia a ṭhang chho turin a duh zawk a ni. Plymouth leh Birmingham manager hlui Rooney chuan, "Ani laka thil thleng pui pui beisei hi a dik lo hle a ni. Kum 15 mi naupang, nuam ti taka football khel ve mai a ni a. A team-mate dangte aiin mipuite ngaihsakna a hlawh hnem ang tih chu a chiang a, mahse he thil hi ṭha takin a hmachhawn theiin ka hria," tiin a sawi.
Kai hian United-ah scholarship contract a ziak tawh a, Michael Carrick-a fapa Jacey pawhin contract hi a ziak ve bawk. October thlaa kum 17 a tlin hnuah professional contract a ziak thei tawh dawn a ni. Khelmual piah lamah pawh zirna lam a thlahthlam lo a, kumin nipui khan a GCSE exam zawng zawng a tiṭha vek a, sixth form-ah zirna a chhunzawm chho mek bawk a ni. A nu Coleen pawhin a fapa GCSE exam a paltlang tak chungchang hi lawm takin a lo sawi chhuak tawh a, khelmual pawnah zir duhna rilru a nei tih a tilang a, Wayne-a sawi tawh ang takin khelmual chhung leh pawnah zir chhunzawm zel tur a awm a ni.
