Manchester derby-a VAR tihsual lian tak thleng vanga refereeing body Pro Ref-in ngaihdam an dil hnuah, Manchester United boss Michael Carrick chuan hmalam pan a pawimawh thu a sawichhuak a, mahse chu tihsual chu pawm a harsa hle tih a pha lo.

Old Trafford-a Manchester derby inkhelah khan Manchester City striker Erling Haaland-a goal khung chu pawm a ni a, he goal hi City chakna goal a ni zui a nih kha. Mahse, offside position-a awm Enzo Fernandez chuan inkhelh a lo tihbuai ve avangin, Pro Ref chuan "ngaihdan dik lo" (error of judgment) an neih thu leh VAR lam pawhin "on-field review" nei tura referee lo hriattir zawk tur an nih thu an pawm ta a ni.

Derby match-a an tlawm hnu lawk hian Carabao Cup third round-ah Brighton lakah 3-2 in United hi an tlawm zui leh a, hei hian Carrick-a dinhmunah pressure a tisang chho hle. Chutiang boruak karah pawh chuan Carrick chuan VAR buaina chu theihnghilha hmalam pan a pawimawh zia a sawi lang a ni.

Derby-a VAR thutlukna avang khan Carrick hian a la haw hle tho na a, VAR system erawh a la rin tlat thu a sawi. "Khatih hun lai khan thil lian tham tak a ni tih kan hria a, sawi nawn fo pawh a ngai tawh lovin ka hria," tiin a sawi.

"Mahse system-ah hian rinna ka la nei a ni, hei hi kan hman mek leh kan thawhpui a nih avangin, ngaihdam min dilna hian awmzia lian tak a nei tehchiam lo. An tihsual an pawm a, an rawn inpuang hi ka hrethiamin ka zah hle a, hetiang thil hi chu a thleng ve thei a ni.

"Hmalam kan pan zel a ngai a, kan hmaa thil lo thleng chu kan hmachhawn a ngai a ni. Nakinah chuan thutlukna pakhat emaw pahnih emaw chu kan lamah a la tang ve bawk ang a, thil a inbuktawk leh mai ang. Mahse kha thil thleng kha chu pawm a harsa hle a, kha match-ah khan nghawng lian tak a nei a, chuvang chuan a na zual hle a ni," tiin Carrick chuan a sawi belh bawk.

Tun hnai kar tlemte chhungin thil tenau te te avangin United an vannei lo fo tih a lo sawi tawh avangin, chanchinbumite chuan VAR tihsualte hian season tluanin nghawng lian tak a neih theih thu an zawt a. Hemi chungchangah hian Carrick chuan, "Khatih hun chhung reiloteah khan nghawng chu a nei ngei mai a, nghawng lian tak pawh a nei thei. Mahse season pumpuiah nghawng chhe zawk a neih chhunzawm zel kan phal tur a ni lova, a rang thei ang bera chak zawk nih leh theihna kawng kan zawn vat a ngai a ni," tiin a chhang.

Thil thleng avang hian an lungawi lo hle chungin, Manchester United chuan Pro Ref lakah hian hmalakna dang engmah an nei zui ta lo a. Match zawh hnu lawka Pro Ref lamin ngaihdam an dil a, an tihsual awmdan chiang taka an hrilhfiahna chungah erawh club hotute chuan lawmthu an sawi thung a ni.