Michael Carrick-a enkawl Manchester United chuan tun season ṭan tir lamah rim a hmu ṭha lo hle a, mualah an chet a tluang zaubawh hle a ni. Kar kalta khan Premier League match-ah an elpui Manchester City lakah 1-0 in an tlawm a, hei hian an league match hmasa li-ah vawikhat chiah an chak tir a ni. Mualfona hi a chhunzawm zui a, kar laia League Cup-ah Old Trafford-ah Brighton mikhualin, goal hnih a hmahruai chungin Brighton hian an rawn overturn a, United hi 3-2 in inelna aṭangin an hnawtchhuak ta a ni.
Hliam avanga squad buai bakah, khelmual pawn lam boruak chiang lo pawhin Carrick-a team hi a tibuai chho mek a. An academy player theihna ngah tak, kum 15 mi JJ Gabriel chuan Old Trafford chhuahsan a tum mek nia tarlan a ni. United hian Gabriel hi an chhuanvawr leh generation thar tana player pawimawh tur anga chhawmdawl an lo tum rualin, he rawlthar hian chhuah a nawr tlat nia report a awm hian club boruak a tiṭha lo hle a ni. Gabriel hi pre-season-a August thlaa Atletico Madrid nena an inhmachhawn ṭum khan minute 8 chhung a inlan tawh a, mahse senior team-ah a la inlan zui leh lo a ni.
Brighton nena an inkhelh ṭum khan rawlthar dang Shea Lacey chuan United senior team tana a goal hmasaber a khung a. Kum 19 mi winger hian mual dinglam aṭanga rawn lutin, minute 7-na lekah a ke veilamin goal mawi tak a khung a ni. Match an tlawm erawh chanchin lawmawm tak a ni lo na a, Carrick chuan he rawlthar chet ṭhatna hi a fak hle.
Carrick chuan, "A tan ka hlim takzet a ni. Inkhelh chhunzawm dan leh kan result-in a hliahkhuh deuh hlek maithei, mahse boruak a reh hnuah chuan a chhuanawm takzet a ni, a tan hun pawimawh tak a ni," tiin a sawi. Hemi hnu hian Carrick chuan Gabriel-a hming la lang lo mah se, an academy system pawimawh zia leh kawngka a inhawng reng tih tarlang chhunzawm in, "Academy-a hnathawktute hi an thawkrim em em a, hei hi he club innghatna thil pakhat a ni. Shea-a'n hun ṭha a hmang ta a, a dawtah tute nge hun ṭha hi rawn bawh zui ang tih kan thlir reng a ni," tiin thuchhah zangkhai tak a hlan a ni.
Liverpool legend Steven Gerrard pawhin JJ Gabriel-a boruak vel chungchang hi a sawi chhuak a, he rawlthar chhehvel-a awm mimal te (nu leh pa, agent leh external influencers) chuan Gabriel hi an nawr kal chak lutuk a nih a rin thu a sawi a ni.
TNT Sports-a a sawinaah Gerrard chuan, "A rukin eng nge thleng a, eng thu nge intiam tih hre lo mah ila, pawn lam aṭanga thlirin he thil hi tute emaw in an nawr lui in, an hmanhmawhpui lutuk hle nia hriatna ka nei a ni. Hei hian naupang tan hian a ṭha zawngin engmah a thlen dawn lo a ni," tiin a sawi.
Gerrard chuan sawi zawmin, "Naupang te te hi nawr lui leh hmanhmawhpui an ni ṭhin hian min tihlau a ni. JJ Gabriel-a chanchin chiang takin hre lo mah ila, United hi khawvela club lian berte zinga mi a ni a, academy aṭanga player ropui tak tak chherchhuahna sulhnu nei ṭha tak an ni. United hotuten a inpeih tawk a an ngaih hunah an khelhtir mai ang. Heng rawlthar te hian nu leh pa, agent leh pawn lam aṭanga fuihtu an nei ṭhin a, an nawr kal hma lutuk ṭhin a ni; hei hian naupang hmakhua a tichhe thei a ni," tiin strict takin rawlthar vawrh lar hluai leh nawr kal thut thut lo turin warning leh thurawn a pe a ni.
