Manchester United goalkeeper Senne Lammens chuan boruak rit tak hmachhawn mek an boss Michael Carrick chu dressing room lamin an thlawp tlat thu a sawichhuak a, kar kalta vela Lisandro Martinez leh Bruno Fernandes ten lungawilohna an lo phawrhchhuah tawh hnuah hetiang thu hi a rawn sawi a ni.

Champions League-a an kirleh hnuah United hian tun season bul an ṭan ṭha lo hle a, inelna hrang hrangah match 11 an khelh tawh aṭangin vawi hnih chauh hnehna an la chang a ni. Atletico Madrid laka an tlawm hnu leh Como laka 4-1 ngawta an mualpho hnu phei kha chuan Carrick-a chunga pressure a sang zual hle a ni.

Martinez chuan United director of football Jason Wilcox a lo sawisel tawh a, nipui transfer bazar chhung khan Carrick-a mamawh khawp player lakluh an nei tawk lo va, hei hian Europe inelna hmachhawn turin squad indaihlohna a thlen niin a lo sawi a nih kha.

Como laka an mualpho hnu lawk khan captain Bruno Fernandes pawhin Carrick leh a coaching staff-te tactics hman danah a lawm loh thu a lo phawrhchhuak bawk a. TNT Sports a biaknaah Fernandes chuan, "Man to man-a nawr (press) loh a, hnung lam hmunawl siama ball chhuhsak tum chu staff-te thutlukna a ni a, mahse hetiang team-te hnena ball i pe tam a nih chuan inrintawkna an nei ṭhin a ni," tiin a sawi.

Manager-in tactics a hmang sual em tih an zawhnaah Fernandes chuan, "Chu chu manager leh staff-te hmuhchhuah tur a ni a, keima tih tur a ni lo. A chang chuan pressure hnuaiah huaisen a ngai a, tlarhma aṭanga nawr na (high press) a, an tana khelmual nawm loh tura siam chu huam a ngai ṭhin a ni," a ti bawk. Como laka an tlawm hnu hian Fernandes chu captaincy hlihsak a tum em tih an zawh khan, Carrick chuan a ruahmanna sawilang lovin, club tana ṭha ber tur chu a ti mai ang tih a sawi a ni.

Kar tawpa Bournemouth an hmachhawn tur chu chak ngei ngei an mamawh tawh em em laiin, Sky Sports hnenah Lammens chuan Carrick a chhan a, dressing room pum chuan an manager hi an thlawp tlat thu a sawi a ni.

United goalkeeper chuan, "Keima mimal ngaihdan chuan dressing room hian [Carrick hi] an thlawp tlat a ni. Mipuite chuan pawn lam aṭangin chu chu an hmu thei lova, chuvang chuan kar tawpa khelmuala kan inlan hunah pawh chutiang a ni tih chu kan pholang ngei tur a ni ang. Mahse, theih tawp kan chhuah a, coach hnungah hian staff, player leh management lam zawng zawng kan ding tlang vek a ni tih ka tiam thei che u a ni," a ti.

Lammens chuan sawi zawmin, "Mitin hian kan khelh ṭhat zawk a ngai tih kan hria a, mahse kan inpumkhat a, team anga hma sawn tumin kan ṭangtlang mek a ni," tiin a tarlang.

Fernandes-a thusawi leh tun season-a an chet chhiat chhanah tactics dik loh vang a ni em tih an zawh belhnaah Lammens chuan, "Season liam ta khan, inkhelh dan phung en chuan tun season hian kan khel ṭha zawk chang a awm maithei, mahse season liam ta khan thil engkim kha a kal tluang em em a, kan vanneih a siam a ni ber.

"Khingpuiten min nawr (press) nat khan team anga buai chang kan nei a, mahse goal erawh kan chhuah tam lo a nih kha. Counter attack hmanga khel team kan nih angin season liam ta khan kan che ṭha em em a; mahse, team dangte chuan kan lakah an khelh dan an thlak dawn tih kan hre vek a, chuvang chuan hma kan sawn a ngai tih pawh kan hrechiang a ni.

"Chuvang chuan tun season-ah hian hmasawn kan ngai a, pre-season lai pawhin inkhel kan chak theihna tur dinhmun ṭha ber kan neih theih nan thil thar tih kan tum ṭhin a ni. Season liam ta ang deuh khan, thil a kal tluan loh hunah pawh team anga kan beih tlan a, team pum anga kan inven tlan (defend) kha kan mamawh lehzual a, chu dinhmun chu kan kirleh ngei a ngai a ni," tiin a tlip a ni.