Manchester United academy rawlthar theihna ngah JJ Gabriel chuan darkar 48 aia tlem chhungin Old Trafford chhuahsanna tur inremna a siam fel theih mai a rinawm ta.

Thawhlehni hian kum 16 a tling dawn a, EU passport a kawl tel avangin European Union (EU) huangchhunga club-te a zawm thei dawn a ni. Amaherawhchu, kum 18 hnuai lam player-te ram dang club-a insawn chungchangah FIFA-in dan khauh tak an neih avangin, hetianga club thar zawm tur hian FIFA phalna a lak hmasak phawt erawh a ngai thung ang.

Gabriel-a aiawhtute hian United chhuahsan tura inremna an ziah theih nan dan leh hrai thil phut eng emaw zat an hlenchhuah a ngai dawn a. Chuti chung chuan dan kawng bumbohte chu an paltlang thei dawn tih inrintawkna nei lo nise chuan, a tira chhuah duhna lehkha hi an thehlut miah lo vang tih hi mi tam tak ngaihdan a ni.

United lam erawh chuan Gabriel hi Old Trafford-a chelh zui theih dan kawng an la zawng fan a. Thla liam ta khan engvanga a aiawhtute hian club chhuahsan dilna thehlut ta mai nge an nih tih United hotute hian hrethiam lo hle mah se, he buaina hi siamṭha a, rawlthar theihna sang tak nei hi chelh theih an la inbeisei hle a ni.

Gabriel hian kar hnih chuang zet liam ta aṭang khan United training hmun Carrington-ah training a nei tawh lo va, amaherawhchu Barcelona khaw daifem Castelldefels-ah ama mimal private coach ruaiin a inbuatsaih ngawrh hle a, a theihna a la vawng nung reng a ni. He rawlthar leh a chhungte hian Barcelona hi an tlawh fo ṭhin a, tualchhung coach thiam bikte nen training an nei ṭhin a, a chang phei chuan Manchester aṭangin ama private coach hi an chah chhuak bawk ṭhin a ni.

Barcelona-a training a neih lai hian Catalan club Barcelona nena inbiakna neih a nih bakah, Real Madrid nen pawh inbiakna an nei bawk nia report a ni. Madrid lam hian Gabriel lakluh theihna dinhmun ṭha bera ding tumin theih tawp an chhuah a, mahse kum 18 hnuai lam player lakluh chungchanga FIFA dan a khauh em avangin he dinhmun hi fimkhur takin an dawngsawng a ni.

Barcelona sporting director Deco chuan Gabriel an ngaihven loh thu sawiin thil awmdan heti hian a sawifiah: "He mipa naupang chungchangah hian sawi tur engmah a awm lo. Kan club nena player-te hming sawizawm a ni ṭhin hi chu thil thleng fo a ni a. Player naupang te te lakah pawh bazar a lian em em a ni. Amah ang dinhmuna ding player hi chu kan ngaihven miah lo. Eng thil chiah nge thleng a, Manchester United player a la ni em tih pawh ka chiang hek lo.

"Keini chu he thilah hian kan inrawlh lo hrim hrim. Eng pawh tih hmain he thil awm dan hi kan hriat chian phawt a ngai a ni. Player naupang, tleirawl te chungchang sawi zui mai mai hi kan buaina tur pawh a ni lo," a ti.

Hetianga Deco-a'n pha mah se, Barcelona hian kum eng emaw zat chhung an lo thlithlai tawh Gabriel hi an la ngaihven reng a, an squad-a lakluh theih dan an melh zui reng tho nia hriat a ni.