Manchester United winger hlui Memphis Depay chuan Old Trafford-a a hun hman lai khan a rilru a buai ṭhin hle tih a sawichhuak. Kum 2015 khan beiseina sang tak nen Manchester United hian lalutin, club chanchina jersey nambar pawimawh em em No. 7 chu an lo hlan a nih kha.

Khatih lai khan kum 21 mi Depay hi Europe huapa rawlthar theihna ngah berte zinga mi nia ngaih a ni a. United boss Louis van Gaal pawhin Paris Saint-Germain laka an chuh hneh theih nan rang taka hma an lak thu a lo sawi tawh bawk. Depay hian Dutch club lian PSV Eindhoven tan a season hnuhnung berah game 40-ah goal 28 ngawt khungin Eredivisie-ah a che ṭha em em a ni.

Nipui bazara £25million senga an lakluh Depay hi Sir Alex Ferguson-a chhuah hnuah United innghahna pawimawh a rawn nih chhoh ngei beisei a ni a. Mahse, he left winger hian Van Gaal-a tactics leh a thil phutte chu a mil thei tlat lova, engvanga lalut nge an nih tih pawh a hrethiam lo hial a ni.

Kum 2019-a a lehkhabu ziah 'Heart of a Lion'-ah Depay chuan, "United-ah khan ka rilru a buai hle a ni. Van Gaal-a tactics ruahmanna kha ka zawm a ngai a, chuti a nih loh chuan team-ah hmun ka chang dawn lo tih ka hria.

"Van Gaal hian a thurawn leh a thusawi zawm lo player hi a ngaina lo a. Mahse chutih rual chuan hetiang zawnga khelh hian ka theihna sang ber ka phochhuak thei dawn lo tih ka hria a ni: khelmual veilamah awm reng a, hma lam leh hnung lam chauhva tlan kual kha a ngai a.

"Ka hrethiam lo a ni: PSV leh Dutch national team-a ka khelh theih dan bik i hmuh avangin min lei a. Chumi hnuah chu ka theihna ang zawnga khel thei tawh miah lo turin dinhmun dangah min dah leh si a. Ka tan chuan a hriatthiamawm loh takzet a ni," tiin a lo ziak a ni.

United-a season tluan a hman awmchhun 2015-16 season khan inelna hrang hrangah match 45 inlanin vawi 27 bul a ṭan a, goal sarih khungin assist vawi nga a nei a. Van Gaal-a hnuaiah a khelh dan a thlak danglam tak avang khan khingpuite tana hlauhawm a nihna a hloh phah hle a ni. A hnu season-ah Jose Mourinho-a hnuaiah match riatah vawikhat chiah bul a ṭan hnuin, January 2017 khan £16m-in Lyon a zawm ta zawk a ni.

French club a zawm tirh hian Depay chuan PSV-a a chet ṭhat dan ang kha neih let leh a duh thu a sawi chhuak a. Lyon tan hian kum li leh a chanve chhungin match 178 a khelhah goal 76 khungin assist vawi 56 lai a nei a, tlarhma striker hriam takah a inthlak chho ta a ni.

Hemi hnu hian kum 2021 khan Barcelona-ah free transfer-in a lut a, thla 18 chhung Atletico Madrid-ah a awm leh hnuin kum 2024 khan Brazil club lian Corinthians a zawm a. Ram tan pawh a che ṭha chhunzawm zelin, September 2025 khan Robin van Persie-a record lo siam chu khumin Netherlands tana goal khung hnem ber a ni ta hial a, match 112-ah goal 55 a khung tling tawh a ni.

Depay hi 2026 World Cup-ah khan Netherlands squad-ah telin match thum a inlan a, round of 32-ah an ram hi an tla a ni.