Khawvel huapa international break kar thum chhung neih mekah kar hnih chu hman ral a ni tawh a, tun ṭum chu Manchester khawpui chhungah club dang (City) lamah mipui ngaihven a kawi thung a ni. Premier League-ah nitin mai thil danglam tak tak a thlen chhoh laiin Old Trafford lamah erawh boruak a reh rih hle a, mahse he rehna hi a daih rei a rinawm loh. United hian tun season bul an ṭan ṭha tawk lo hle a, league match a rawn inṭan leh hunah chuan Old Trafford boruak leh Michael Carrick-a dinhmun chu ngaihven a ni chho leh vat dawn a ni.
Benjamin Sesko-a hliam leh striker indaihlohna chungchang:
Squad-ah striker pakhat chiah awmin Sesko lah a inhliam ngun em em a, board lamin engvanga hma la lo nge an nih tih zawhnaah, tun dinhmunah chuan hei hi board lam tihsual lian tak a ni tih a chiang hle. United hotute chuan Sesko-a chawnruh (shin) hliam kha a dam fel tawh tura an ngaih laiin, a rawn chhuah leh tak si avangin ngaihtuahawm lian tak a tling a ni. Chuti chung chuan Carrick leh director of football Jason Wilcox te khan an attacking options neih mekah an lungawi tawk hle a; Joshua Zirkzee pawh chhuah tir a, a man sum chu left-back lak nana hman an lo inpeih hial a nih kha.
Marcus Rashford, Bryan Mbeumo leh Matheus Cunha te tlarhma laili striker-ah an khel thei vek a, mahse Rashford-a'n striker nih a duh lo a, Cunha-a tan lah a fuh bawk si lo. Amad Diallo a inhliam bawk nen mual dinglamah Mbeumo awl theih a ni bawk si lo a ni. Danny Welbeck a thlawna lak theih a nih lai khan lak mai tur a nih nen, an la lo kha a mak hle a, tunah chuan striker indaihlohnain a nangching ta a ni.
Marcus Rashford-a khelh dan chungchang:
Rashford-a'n beisei a phak tawk lo chung pawha engvanga Carrick-a'n bul ṭantir reng nge a nih tih zawhnaah, goal leh assist stats lamah la langsar lutuk lo mah se a khel chhe lo hle zawk a ni. Goal chu a khung tawh tur a ni ngei mai, mahse Premier League-ah chance lian tham 13 lai a siam tawh a, hei hi captain Bruno Fernandes-a tlukpui chiah a ni. Wing-ah chakna leh tlang taka nawrna a rawn thlen theih bakah, Cunha No. 9-ah a awm a, Patrick Dorgu a inhliam bawk si avangin Rashford-a thlaktu tur player dang rintlak an nei meuh lo a ni.
Carrick-a khelh dan phung (tactics) thlak chungchang:
United hian engvanga rang taka attack nei ṭhin kha bansana transition muang tak hmang ta nge an nih tih zawhnaah, Carrick hian a team chu khelmual thunun tam turin a duh a, Middlesbrough a enkawl lai pawhin chutiang chuan counter-attack aia zawi muanga in-pass kual ṭhin a ni. Season liam taa counter-attack hmanga an nawr thut thut kha a hlawhtling hle a, chutianga khelh chu United hian an thiam zawk mah niin a lang. Carrick-a khelh dan thar erawh hi chu a la nghet tawk lo a ni.
JJ Gabriel-a transfer chungchang:
Rawlthar theihna ngah JJ Gabriel-a hian club a chhuahsan dawn em tih chungchangah, a la chhuak lo na a, a chhuah ngei chu pumpelh theih a nih hmel tawh loh hle. Thawhlehni hian kum 16 a tling dawn a, EU passport a neih avangin European club dang a pan theihna tur thuthlung a ziak thei tawh dawn a, FIFA hnenah pawmpuina an dil ang a, FIFA hian an pawmpui ngei a rinawm bawk. United lamin Gabriel-a hi chelh tumin theihtawp an chhuah a, Thawhlehni hian scholarship terms ṭha tak an thehlut dawn a ni. Mahse pre-season-ah minute 8 chauh a khelh tir bakah Sabah nena Champions League match-ah hlamchhiah a nih avangin a aiawhtute an lungawi lo a, a chhungten hmun dang pan an duh phah ta niin a lang.
