Atletico Madrid chuan Manchester United captain Bruno Fernandes chu lakluh turin an ngaihven thar leh ṭan a, nipui transfer bazar a lo hnaih leh takah hian he Portuguese midfielder hi an mual lama sawn luh dan kawng an ngaihtuah mek nia tarlan a ni.
Atletico Madrid manager Diego Simeone chuan he Manchester United skipper hi a lo ngaihsan tawhna a rei tawh hle a. Kum 2018 khan Europa League inelnaah Sporting Lisbon leh Atletico Madrid te an inhmachhawn ṭum khan, Fernandes-a khelh dan chuan he Argentine manager mit hi a lo la hle tawh a ni. Hemi aṭang tawh hian Simeone-a'n Fernandes-a khelh dan leh a theihna hi ngun takin a lo chik tawh ṭhin a ni.
CaughtOffside report-in a tarlan danin, Atletico Madrid hian kum 32 mi Fernandes-a dinhmun hi Old Trafford-ah ngun takin an enthla mek a, a bikin kum 2027 transfer bazar a lo thlen hmain he inremna hi tihpuitlin dan kawng an melh ṭan hial a ni. Simeone-a tana Bruno Fernandes lakluh hi a lo duh ruk tawh reilote hnuah a taka chantir lehna hunṭha a rawn inhawng a ni maithei.
Mahse he Portuguese star lakluh tumna kawngah hian Atletico Madrid tan thil awlsam tak a ni dawn lo a. Sum leh pai lama an inphut zat bakah, club dang engemaw zat – an vaia club pali ngawt mai – te pawhin he midfielder lian hi an ngaihven ve mek avangin inelna a sang hle dawn a ni.
Kum 32 mi Fernandes-a tan pawh kumin leh kum 2027 inkar hi a career-a thutlukna pawimawh tak a siam a ngaihna hun tur a ni chho mek a. 2025/26 campaign inṭan hma khan Fernandes-a hian team-a a mawhphurhna leh an club hmabak chungchang a lo sawichhuak tawh a, Old Trafford-a a hma hun tur hi mi tam tak thlir thup ber a ni mek a ni.
Manchester United tan pawh an captain leh player pawimawh ber zinga mi hmabak chungchanga thutlukna siam hi thil harsa tak a ni dawn a. Club dang hrang hrangin lakluh an tum mek lai hian, United hotute pawhin Fernandes-a chungchangah hian eng thutlukna nge an siam zui zel dawn tih chu nghah a la ngai rih a ni.
