Manchester United chhuahsan a duh thu rawlthar theihna ngah JJ Gabriel-a'n a thlen hnuah, Old Trafford-a a hmabak tur chu a chiang lo hle a ni. Champions League-a Sabah an hmachhawn ṭum leh Carabao Cup-a Brighton & Hove Albion an tum ṭuma khelmualah minute 20 tal khelhna hun pek a nih loh avangin he kum 16 mi forward hian club chhuahsan hi a ngen ta nia hriat a ni.
Brighton lakah hian head coach Michael Carrick chuan senior first-team tana a debut match siamsak a lo tum hman a, mahse Carrington-a training neih mek chu he wonderkid hian engtik thleng nge tih hriat lohva a chhuahsan zui tak si avangin Carrick-a ruahmanna pawh a ṭhulh phah ta a ni. INEOS lam erawh chuan he English rawlthar hi Old Trafford-a cham zui tura thlem theih an la beisei fan a, club dangin dan lova an lo biakruk (tap up) a nih chuan dan anga hmalak hial pawh an inhuam reng bawk.
He England Under-17 international hi Real Madrid leh Barcelona te pawhin an lo it tawh hle a, tun dinhmunah phei chuan Catalunya lamah amahin training a nei mek nghe nghe a ni. Mahse La Liga champion Barcelona chuan he tlangval umzui hi an chawlhsan ta a; Sky Sports tarlan danin German champion Bayern Munich chu Gabriel-a lakluh tum hian inelna huangah an rawn inrawlh thar ve leh ta a ni.
Sky Sport-in a tarlan dan chuan, Bayern Munich hotute leh Gabriel-a aiawhtute inkarah hian inbiakna a thleng tawh a, Thawhṭanni khan inbiak chhunzawm leh tura ruahman a ni bawk. Amaherawhchu, sum lam thil phut a san em avangin he transfer hi a puitling dawn em tihah harsatna lian tak a awm mek a ni. Gabriel hian professional contract puitling a la neih loh avangin, ram dang club a pan a nih chuan training compensation fee chauh club lakah chawi a ngai dawn a. Mahse a hlawh tur bakah contract ziah man (signing fee) an phut san lutuk avangin inremna siam a harsa hle a ni.
The Times-in a tarlan belh dan phei chuan, kum 16 mi Gabriel-a aiawhtute hian kum khatah hlawh pound maktaduai chuang (seven-figure salary) lai an phut a, hetiang em ema rawlthar tana hlawh tam thehchhuah chu Bundesliga kawltu Bayern Munich hian an remti lo hle a ni.
Bavarian club-in hetiang zata sum tam pek an hreh tak si ah chuan, Chelsea dawrna lo hnawl tawhtu Gabriel tan hian Real Madrid leh Paris Saint-Germain te chu a thlan theih awmchhun an ni mai dawn niin a lang.
Academy aṭanga an player theihna ngah berte zinga mi an chan mai dawn avangin Manchester United ṭantute tan chuan a lawmawm loh hle dawn a, mahse kum 16 mi naupang thunun theih loha an awmtir duh lo hi club tan chuan thutlukna fing tak a ni thung. A chhungte thuhnuaia intukluh United hian an tum lo bur a, he rawlthar laltu club thar tur pawh hian a pa dawr a harsat zia an hre thuai dawn nia ngaih a ni.
