Manchester United chuan an youth academy thuam ṭhat leh tihhmasawn nan thla eng emaw zat chhung chu a ruka hma lain hna an thawk mek a. Chumi kal zelah chuan an elpui lian Liverpool academy-a lo thawk tawh coach tawnhriat ngah Danny Hastings chu Under-13s Coach Analyst atan an lalut ta a ni.
Hastings hian LinkedIn kaltlangin Manchester United a zawm thu hi a nemnghet a, a profile tarlan danin September thla aṭang khan he full-time hna hi a chelh ṭan tawh a ni. Kum sarih dawn zet an hmelma Liverpool tana a lo thawh tawh avangin United hian a tawnhriat neih ṭhatte chu an chhawr ṭangkai hle tura beisei a ni.
Kum 2014 leh 2021 inkar khan Anfield club-ah International Football Academy Coach hna a lo chelh tawh a, hemi rual hian Liverpool Women Under-10, Under-12, Under-14 leh Under-16 team-te pawh a lo enkawl tawh bawk. Chu mai bakah hun eng emaw chhung chu interim Under-21s coach dinhmun a lo chelh tawh bawk a, hei hian academy huang chhungah kum rual hrang hrang enkawl theihna leh theihna a nei ṭha hle tih a tarlang chiang hle.
Liverpool a chhuahsan hnuah Hastings hian Fleetwood Town a zawm a, kum ruk chhung a thawh chhungin International Academy Lead Coach leh Lead Youth Development Phase Coach hnate a lo thawk tawh bawk a ni. United lam chuan he coach tawnhriat ngah tak hi club-ah hun rei tak awmin, an academy player naupang zawk te chher hriam kawngah tha hnem tak a thawh ngei an beisei a ni.
Thla hmasa khan academy star JJ Gabriel-a'n club chhuahsan a duh thu thawm a darh a, he thil hian boruak a tiṭang hle a nih kha. Chutiang boruak karah pawh chuan United hian an academy dinhmun siamṭhat zelin hma an la reng a, Noah Ajayi chuan a professional contract hmasaber a ziak fel a ni.
Player lakluh kawngah pawh United hian hma an la chak hle a, Manchester City leh Liverpool academy aṭangin rawlthar theihna ngah tak tak lakluh an nei nual bawk. City aṭangin Karim Cassim leh David Eze te an lalut a, Isaac Konde chu Liverpool aṭangin an la lut bawk a ni. Heng bakah hian squad thuamchak turin English academy dang aṭangin Tynan Thompson leh Kit Margetson te pawh an lo lalut tawh bawk a ni.
Player lakkhawm bakah United hian academy tana backroom staff ṭha tak tak lakluh hi an ngai pawimawh chho hle a, Hastings-a lakluhna hian United-in an academy tana hmabak thui tak an thlir zia a tarlang chiang hle a ni.
