Lionel Messi chuan Argentina tana a match hnuhnung ber a khelhah goal khat khungin assist vawi hnih a nei a, Benin laka 3-0 a an chak ṭumin hun hriatreng tlak tak a hmang a. He inkhel hriatreng tlak takah hian Manchester United defender Lisandro Martinez pawh minute 52-naah bench aṭangin a rawn lut a, Messi nen khelmuala an inlan dun hnuhnun ber tur chu minute 38 chhung a hmang ve a ni.

Estadio Monumental-ah mipui khat mup hmaah boruak a sang hle a, Messi-a mangṭhana match-ah hnehna chan ngei chu mipuite beisei ber a ni. Hei hian a khelhpui player-te tan pawh pressure danglam bik a siam a, tihsual palh emaw chet chhiat palh hlauhawm tak a ni. Mahse Martinez hian bench aṭanga a rawn luh hnuah tihsual engmah a nei lo a, pass vawi 21 a neih zawng zawng chu a hlawhtling vek a, tlarhnung venhim kawngah vawi li thawhhlawkna a nei bawk a ni. Match zawhah Messi a fak zui hle bawk.

He inkhela Martinez-a chet dan chungchangah hian Argentina chanchinbu leh media hrang hrangte chuan rating pe in an thlirlet hlawm a:

La Pagina Millonaria chuan 6/10 pein, "Otamendi thlakin a rawn lut a, fiahna a tawk meuh lo. Ball semchhuah kawngah a dik em em a, innuaina (duels)-ah pawh a nghet hle," tiin an tarlang.

BolaVIP pawhin 6/10 an pe a, "Inthlakna ṭha tak a ni, khingpui lamin an nawr tlem lai takin a rawn lut a. Otamendi thlaktu tur a ni a, 2026 World Cup-ah pawh khan chu chu a lo ti tawh reng a ni," tiin an ziak.

TyC Sports erawh chuan he inkhel boruak zangkhai loh zia leh Messi mangṭhana a nihna hlut zia enin, inkhela inlan player zawng zawng hnenah 10/10 an pe vek a, Martinez pawh a tel a ni.

Chaco Periodico chuan Martinez hi 5/10 an pe a, Messi chauh 10/10 an pe thung. Uno Santa Fe pawhin 5/10 an pe ve bawk a, "Second half-a a rawn luh hian fiahna a tawk lem lo a, Benin lamin khelmual chanve an pel mang lo a ni," tiin an thlirlet.

Ram tana a inlan zawh hnu hian Martinez hi Manchester United training hmun Carrington-ah a kir leh nghal dawn a, Michael Carrick-a enkawl United hian Old Trafford-ah Tottenham Hotspur an lo mikhual dawn a ni. He match hi United tan chuan chak ngei ngei ngai (must-win) a nih laiin, zinkualna hun a tawi em avangin Martinez hi bul ṭantir lovin bench aṭangin a rawn luh tir maithei a ni. A bik takin international break chhunga France tana a debut match-a Leny Yoro chet ṭhat dan enin, Carrick hian bulṭantu tur thlan kawngah thutlukna a siam a ngai ang.