Royal Antwerp aṭanga Manchester United zawm chu rahbi thar lian tak a ni a, Senne Lammens hian he club lianah hian insiamremna a nei zung zung thei ang em tih mi tam takin an ngaihtuah a nih kha. Mahse, kum 2025 deadline day-a Old Trafford a luh hnuah he Belgian goalkeeper hian beisei aia rangin insiamremna a nei fel nghal der a ni.
Bruno Fernandes-a chet ṭhat em vang chauhvin 2025-26 season khan Lammens hian club player of the year lawmman a dawng lo chauh zawk a ni. Tunah hian Belgium national team lamah fehchhuakin, hun rei tak ram tana lo inlan tawh Thibaut Courtois-a hmunruak luah tura inbuatsaih mek a ni bawk.
Manchester United-a a khelh chhung hian mi hrang hrang laka endikna leh sawiselna a tawk zing hle a, chu chuan ram aiawha a khelh chhoh zelna tur kawngah a inbuatsaihna ṭha tak a nih thu Lammens hian a sawi. Television pundit hna thawk mektu United player hlui ropui Roy Keane leh Paul Scholes te anga miten uluk taka an chetzia an chhui zui ṭhin avangin, rilru lama paukhauh leh puitlin chu a thawkrimpui hle tih a sawichhuak bawk a ni.
Belgian chanchinbu Nieuwsblad hnenah Lammens chuan, "Manchester United tana khelh hian ka mizia a thlak danglam lo. Mite'n ngaihdan hrang hrang an neih leh an sawi sup sup lai hian rilru lama paukhauh leh mahni inrintawk tlat a ngai a ni. Hei hi mi zawng zawng tan thil awlsam a ni lo maithei tih chu ka hria. Premier League match zawng zawng khelh hi nuam ka ti a. Premier League emaw Nations League pawh nise, ka tan chuan danglamna a awm lo," tiin a sawi.
Lammens-a thusawi hi Belgium manager Mark van Bommel pawhin a thlawp hle a, he goalkeeper theihna sang chho zel chu a fak hle bawk. Van Bommel chuan, "Senne-a thatna bik em em chu, boruak eng ang pawh hmachhawn se a mizia a ngai reng thei hi a ni. Chu chu a zia leh a theihna tak tak a ni reng bawk. Manchester United-a a insiamrem chhoh zung zung dan hi han en ta che. Antwerp aiin club chu a hausa zawk a, stadium pawh a lian fe zawk a... A tlarhnung venghimtu defenders te nen inzawmna ṭha tak an nei bawk a, hei hi fak tlak tak a ni," tiin a sawi a ni.
World Cup-ah khan Lammens hian tihsual liantham nei ve bawk mah se, khelmual chhungah erawh a inngaihtuah buaitir lo hle a. Manchester United an chet ṭhat tawk loh lai pawhin ani erawh chuan theihna sang tak a phochhuak chhunzawm reng a ni. Belgium hian ram tana chawlh (international break) chhung hian match hnih an la khel dawn a, Turkey leh France te an hmachhawn chho dawn a ni.
