Manchester United rawlthar hlui Alejandro Garnacho-a career chu a tlahniam zel a, a dinhmun a chhe tial tial mek a ni. Kum 22 mi Argentina forward hian kum 2022 khan Red Devils te chu FA Youth Cup-ah a champion pui a, final-ah goal hnih khungin khawvel hriatah a rawn langsar ṭan a nih kha.

Khami kum tawp lam khan United first team tan a debut a siam zui a, club tan hian match 144 inlanin goal 26 a khung hman a ni. Mahse, Manchester United head coach Ruben Amorim-a hnuaiah hmun a chan tak loh avangin, kum 2025 nipui khan Chelsea hnenah hralh a ni ta a. Chelsea-ah hian season khat chhung awmin match 43-ah goal 8 a khung a, mahse London club-ah hian beisei a phak tak loh avangin transfer window liam ta khan Aston Villa-ah loan-in a chhuak leh ta a ni.

Sports Illustrated-in tun season-a Garnacho-a harsatna hmachhawn mek a tarlan danin, tun kar khan Aston Villa manager Unai Emery-a'n Garnacho-a hnenah midang lakah a "hnufual" (behind) tawh thu leh, inkhelhna hmun a chan theih nan a "thawhrim" (work) a ngaih thu a hrilh a ni. Villa tlarhmaah hian player dangte'n hmun an chan hmasak tak zawk avangin he winger-a career hi a ding thup mek a ni.

Emery-a'n team a siksawi (rotation) nasa hle chung pawhin, Coventry nena an inkhelh ṭumin Garnacho hi bench-ah a ṭhut tir char char a. Villa tana Premier League match hmasa pathum khelh tawhah minute 31 chauh khelmualah a hmang a, kar liam ta tawpa Nottingham Forest laka an tlawm ṭum phei khan bench aṭanga luhna hun pawh a chang pha tawh lo a ni.

Emery chuan he player chungchang sawiin, nakina hun ṭha a hmuh leh a nih chuan "ṭha taka khelh a tum" (has to try and play well) a ngai a ni tiin a sawi.

Kum 2024-a Puskás Award lo dawng tawh tu tan chuan hetianga a career a tlahniam thut hi a mak hle a. A chet chhiat chhunzawm tak avang hian kumin 2026 World Cup final thleng thei Argentina squad-ah pawh koh tel a ni ta lo a ni.