Manchester United tana khelh hian pressure a sang em em a, kum sawm liam ta chhung khan Harry Maguire-a tluk hian sawisel leh thlir zui hlawh an awm kher lo ang. He centre-back hian sawiselna nasa tak a tawk ṭhin a, a tawpah phei chuan a captain armband pawh hlihsak a ni hial a ni. Maguire hi man to taka an lakluh, hlawhtling zo lo (flop) ni mai tur anga ngaih a nih laiin, a beidawng duh lo va. He England international hian a theihna phochhuak lehin fan-te rinna a hlawhchhuak leh a, a bikin Michael Carrick-a enkawlna hnuaiah chuan United player rintlak berte zinga mi a ni chho leh ta a ni. Old Trafford-a Carrick-a a rawn kir hnua a chet ṭhat em avang hian contract thar hial a hmuh phah a, kumin nipuia World Cup khel tur pawha koh loh chu a uiawm hle a ni.
Maguire hi captaincy a chelh lai ai khan tunah hian hruaitu (leader) a nihna a langsar zawk hial a. Chuvang tak chuan Leny Yoro leh Ayden Heaven te chu hmakhuaa tlarhnung inkawp tur ṭha ber an nih tur thu a sawi khan, he rawlthar pahnihte laka beiseina pawh a sang chho hle a ni. August thla khan Sky Sports-ah Maguire chuan, "Kum nga emaw paruk hnuah chuan Leny, Ayden leh Dan [Armer] te hi he team-ah hian inchelh tawnin an khelh tlan ngei ka beisei a, chu chu ka thil duh ber a ni. Hetiang ti thei tur hian theihna leh mizia an nei ṭha hle a ni. An la naupang a, mahse mitinin an thlir rengna hnuaiah hian inkhelh dan an zir mek a, an la chak chho zel dawn a ni. Ni khat chu he club-a centre-half inkawp ber an la nih a, nomawi lian ber berte an la chawi ngei ka beisei a ni. Khawvel football-ah tlarhnung inkawp chak ber an la nih ka beisei a, chu chu an thiltum tur a ni," tiin a lo sawi tawh a ni.
Yoro leh Heaven te hian theihna sang tak an nei tih an pholang zeuh ṭhin a. Yoro hi Old Trafford a pan hma khan "Raphael Varane thar" ti hialin an lo sawi tawh a, an khelh danah pawh inanna lai tam tak a awm a ni. Chutih laiin Heaven pawhin chet ṭhat châng a nei nual a, engati nge Arsenal khan hunṭha an pek tam loh tih pawh sawi a tam hle. Mahse tun dinhmunah chuan he player pahnihte hi an la rintlak tawk lo thung. Kum 20 mi Yoro leh kum 19 mi Heaven te hian hun an la ngah a, tuman an la hnawl mai dawn lo.
Amaherawhchu, United dinhmun thlirin he rawlthar pahnihte hian hma an sawn chak a ngai hle thung a ni. Maguire hian club nena an contract hnuhnung ber tur a hmang mek a, Lisandro Martinez hi tlarhnung ṭha ber ni mah se hliam lakah a fihlim hleihtheih loh avangin chhawr reng a harsa a. Matthijs de Ligt lah November 2025 aṭang khan hliam vangin a la chawl char char bawk si a, a rawn kir leh hunah pawh a theihna ngaiah a kir leh nghal thei ang em tih a la chiang lo a ni.
Hemi a nih avang hian Yoro leh Heaven te hi senior team-ah hmanhmawh taka chhawr an ngai thuai dawn niin a lang. Mahse, Brighton laka an chet dan en khan 'khawvel tlarhnung inkawp chak ber' ni tur chuan an la hla hle tih a lang chiang a. United chuan he rawlthar pahnihte hi Maguire leh Martinez te bula khel chungin an la inzir chhunzawm zel an beisei a ni. Khelmuala an inkawp leh hunah chuan tun aia ṭha hian an khelh a ngai tawh dawn a, tun dinhmunah chuan Maguire-a'n beiseina sang tak a siamsak chu an la pha lo hle a ni.
