Manchester United manager Michael Carrick-a dinhmun a derthawng hle a, Fulham an hmachhawn hma hian a thlaktu tur ngaihtuahin INEOS chuan candidate mi panga vel 'due diligence' an kalpui mek nia tarlan a ni.
Reporter Ben Jacobs-a tarlan danin, Old Trafford club thuneitu INEOS te hian club legend ni bawk Carrick hi thlawpna famkim an pe tawh lo nia hriat a ni a, a thlaktu atana an ngaihtuah mek hi candidate panga ngawt an nei tawh a ni.
Carabao Cup-a beisei loh taka an tlawm hnu leh Manchester derby-a an tlawm leh hnu hian Old Trafford-ah pressure a sang tawh hle a. Tun season bul ṭan dan hi Manchester United tan chuan a duhawm lo hle a, league match li an khelh tawhah vawikhat chiah chakin, vawikhat an inhnehtawk a, vawihnih an tlawm tawh avangin Premier League table-ah 13-na dinhmunah chiah an ding mek a ni. He thil avang hian manager naupang tak Carrick-a tana boruak a rit chho hle.
Fabrizio Romano-a tarlan danin, Manchester derby-a an tlawm zui takah khan Manchester United hotute chuan Carrick-a hmakhua leh a hna chungchangah thutlukna eng emaw an siam tawh a ni. Hemi hnu hian journalist Pete O'Rourke chuan Football Insider hnenah tarlan lehin, INEOS lam hian Carrick hi team form leh dinhmun siamṭha tura hun ṭha pek la tum hrih an nih thu a sawi thung.
Manchester United defender hlui Rio Ferdinand pawhin Carrick-a hmakhua chungchang hi a lo sawi tawh a, Luis Enrique-a awm theihna leh awm lohna chiah hian Michael Carrick-a'n United manager a ngheta a chelh zui zelna tur kawng a daltir thei tiin a lo sawi tawh a ni. Ruben Amorim-a hmunruak luahtu Carrick hian a tirah chuan United hi ṭha takin a lo kaihruai tawh ṭhin a, inelna hrang hrangah beiseina sâng tak a lo siamsak tawh a ni.
Mahse, 2026-2027 season bul ṭan mekah hian Carrick hi INEOS leh recruitment team te lakah beidawng takin a awm nia sawi a ni bawk. United legend ni bawk he manager naupang tak ban hi INEOS tan thutlukna harsa tak ni dawn mah se, result an neih ṭhat zel loh chuan thutlukna khauh zawk an siam a ngai dawn nia langin, Fulham nena an inkhelh tur hi Carrick-a hmakhua ti chiang tu pawimawh tak a ni dawn ta a ni.
