Kum sawm liam ta chhung khan Manchester United hian transfer bazar-ah tihsual tam tak an lo nei tawh a, chung zingah chuan kum engemaw zat liam taa Erling Haaland chu £4m chauhva lakluh theih a nih laia an lo lalut ta lo kha an tihsual lian ber zinga mi a ni hial awm e. Tunah hian United chuan Norway rama rawlthar che langsar em em Gabriel Rajkovic chu an thlithlai ve leh mek a ni.
United hian anmahni academy rawlthar kum 15 mi JJ Gabriel chu an chan mai dawn nia chanchin a darh kar liam ta chhung khan, he Norway wonderkid kum 15 mi Gabriel Rajkovic hi Red Devils lamin an ngaihven chho ve leh ta thung a ni. Norway chanchinbu TV2 tarlan danin, Valerenga player naupang Rajkovic hian United mit a la hle a ni.
Rajkovic hi Chelsea, Arsenal leh Barcelona te pawhin an ngaihven ve tho bawk a. Mahse Manchester United hian midang aiin dinhmun ṭha zawk an luah thung. Norway chanchinbu Nettavisen kaltlanga a sawi danin, Rajkovic chuan, "Hetiang thil hi ngaihtuah thuk lutuk loh ka tum a, mahse an ngaihven thu hriat erawh nuam ka ti hle mai. Ka naupan tet aṭang tawhin Manchester United hi ka lo ṭan ṭhin a, mahse tun dinhmunah chuan Valerenga tana khelh chauh hi ka rilru luahkhattu a ni," tiin a sawi a ni.
Rajkovic hi Norway youth international ni lai mek a ni a, amaherawhchu senior level-ah erawh Serbia tan pawh a inlan thei bawk. Left-winger anga khel ṭhin ni mah se, tlarhma hmun hrang hrangah chhawr theih a ni.
United rawlthar JJ Gabriel ang lo takin, Rajkovic hi senior team-ah a inlan zing tawh hle a, match tlemtea inlan satliah mai pawh a ni lo. Norway top-flight club Valerenga tan senior match 14 ngawt a khel tawh a, goal thum khung tawhin assist vawi khat a nei tawh bawk a ni.
Valerenga hian Rajkovic hi kum 2028 thleng daih contract an ziahpui tawh a. Chu bakah, dan kalhmang siksawi dan remchang an hmu a nih loh chuan, kum 18 a tlin hma chu (January 2029 transfer window thleng) United hian an lalut thei rih dawn lo a ni. Chuti chung chuan United hian a hmasawnna hi an thlithlai ngawrh hle a, a hnu zela lakluh theih dan kawngah club dangte lakah beiseina sang zawk an nei tlat a ni.
