Jamie Redknapp chuan Manchester United co-owner Sir Jim Ratcliffe hnenah Michael Carrick-a thlaktu atan manager pahnih chiah rintlak an awm thu a sawi.

Old Trafford club hian tun hnaiah result ṭha lo tak tak an hmachhawn chhoh zel avangin Carrick-a hmabak chungchangah sawi a tam hle a ni.

Kar tawp liam ta khan United chuan Premier League match-ah Chelsea 2-0 in an hneh lo a, he an tlawmna avang hian Red Devils te hi goal difference-a relegate zone chung chiahah thleng hniamin, mual mawng lama awm Sunderland aiin point hnih chauhin an chungnung zawk a ni. Carrick-a hnuaiah United hian August 30 hnuah Premier League match-ah chak hmel an la hmu miah lo a, inelna hrang hrangah a zawnin match 9 chhung chak nei miah lovin hun an hmang mek a ni.

Kumin nipui lai khan Carrick hi permanent manager atan ruat ni chauh mah se, club hotute chuan manager thlak mai an rilruk mek nia thuthang a chhuak nasa hle. Sky Sports-a a ṭawngnaah Redknapp chuan Newcastle manager hlui Eddie Howe leh Aston Villa boss Unai Emery te chiah hi United enkawl tlak an nih thu a sawi.

Redknapp chuan, "A nihna takah chuan candidate pahnih chiah an awm in ka hria. Michael Carrick hi a hnaah a la awm reng avangin hetiang thu sawi hi a mawi chiah lo mai thei. Mahse, team dinhmun hi a ṭhat chhoh loh chuan a hna a chan tur hi thil thleng ngei ngei tur a ni. Emery leh Eddie Howe te chiah hi manager ni thei tur an ni," tiin a sawi.

Germany national team boss a nihna a chhuahsan hnua United nena sawizawm tel tak, Bayern Munich manager hlui Julian Nagelsmann chungchang sawiin Redknapp chuan, "Julian Nagelsmann hi Germany-ah chuan a che ṭha thawkhat hle a. A career ṭan tirh lamah ṭha em em mah se, kum tlem te liam ta chhung erawh khan World Cup-a Germany nena an chet dan te thlirin a che a ṭha vur tawh bik lo a ni," a ti.

Emery-a chungchang sawi chhunzawmin Redknapp chuan, "Ani (Emery) chiah hi ka hmu thei a ni. Mahse, Aston Villa chhuahsan hi a duh ang em tih erawh zawhna a ni. Villa-ah hian project pui tak a nei a, a duh duh a ti thei a, club hi amah ngeiin a enkawl a ni ber. Mahse Manchester United enkawl chu chona lian tak a ni tih ngaihtuahin, manager tawh phawt chuan chapona tlem an nei ṭheuh a, United hi an dinhmun aṭangin an chawi kang thei a ni tih an inring bur ṭhin. Emery-a theihna nen chuan he hna hlen chhuak thei tura ka rin ngam awmchhun a ni ang. Manager thar leh a assistant lek lut a, United thil kual vel ti danglam ve ngawt thei tur hi an awm ka ring lo, a chhan chu thil hmuh theih loh lama inphum ru eng emaw zat inthlak ngai a awm a ni," tiin a sawi bawk.