Manchester United-in kumin nipui bazar an hman dan beisei a phak loh em avangin head coach Michael Carrick chu dinhmun khirh takah a ding mek a ni.
United director of football Jason Wilcox leh a thawhpuite chuan midfield thuam ṭhat ngai pawimawh hle mah se, khelmual hmun dang erawh an hlamchhiah thung a. Left-back leh striker lak belh loh an thlang chu thil tihsual lian tak a nih chhoh hmel ta hle.
Tottenham Hotspur an hmachhawn hmain, Carrick chuan Patrick Dorgu leh Benjamin Sesko te chu hliam avangin an inlan thei dawn lo tih a nemnghet a. Sesko-a'n a chawnruh hliam vanga season liam ta chanve hnuhnung aṭanga inkhelh theih loh a neih fo avangin, Carrick-a'n Matheus Cunha, Bryan Mbeumo leh Joshua Zirkzee te lakah innghahna a zawn a ngai ṭhin.
Heng player pathumte hian United attack an ho ṭumin chhan hrang hrang vangin beisei an phak tawk lo va, Sesko a la chawlh reng bawk si avangin Carrick hian kawng dang a dap a hun ta hle a ni.
He harsatna sutkian nan hian kum ruk liam ta chhunga manager hrang hrang hnuaia theihna hrang hrang pholang tawh player pakhat chu United striker buaina chinfelna atan a ṭangkai hle maithei a ni.
Ruben Amorim-a hnuaia box-to-box midfielder anga a khelh ṭhat hnuah, kumin tir lama Carrick a lo thlen khan Bruno Fernandes chu a khelhna nuam tih ber number 10 position-ah dah let a ni a. Khelmual hma lama a luh chhoh leh hnuah Fernandes hi a theihna sang berah kir lehin, Premier League-a assist ngah ber record thar siamin season a khar a nih kha.
Manager hmasate zingah Ralf Rangnick leh Erik ten Hag te pawhin Fernandes-a theihna hi hmang ṭangkaiin 'false nine' angin an lo chhawr tawh ṭhin a ni.
Kum 2024 FA Cup final-a Manchester City an hmachhawn ṭum khan, striker pangngai an neih loh avangin Ten Hag-a'n attack hmahruaitu atan Fernandes hi a ring tawk a. Portuguese thiampuipa hian inkhel ropui tak khel chhuakin, chakna goal Kobbie Mainoo-a'n a khung theih nan en miah lovin (no-look assist) mawi takin a siamsak a nih kha.
Fernandes hi tun dinhmuna Europe huapa pass thiam ber zinga mi a ni tih hai rual a ni lo va, chutih rualin shot hlauhawm tak nei a nih bakah goal khung theihna kawng hrang hrang a nei tel bawk. United leh a club hlui Sporting CP-ah pawh assist a neih aiin goal a khung hnem zawk a ni. Kum 32 mi hian kumin season-ah pawh Ipswich Town lakah hat-trick siamin goal hmaah a la hlauhawm zia a lantir tawh a ni.
Fernandes-a zinga fakawm em em chu eng position-ah pawh khel se, chawl miah lova thawkrimin tumpuite nawr (press) kawngah hma a hruai reng ṭhin hi a ni. Chu mai bakah, false nine anga a rawn tawlhhniam changin Marcus Rashford leh Mbeumo te tan hmunawl zau tak a siamsak thei dawn bawk a ni.
A hma chuan Fernandes hi tlar hma lama a khelh changin United-in hnuai lam aṭanga ball chhuahpui tur midfielder ṭha an nei tawk ngai lo va. Mahse tunah chuan a danglam tawh a, Mainoo leh Youri Tielemans te chu technical thiamna nei ṭha, ball khalh chhuak thei leh final third-a an ṭhiante hmu thei ve ve an ni tawh tlat a ni.
Fernandes-a striker-a a tawlh chhoh hian midfielder thar Carlos Baleba tan first-eleven luhna hun remchang a inhawng dawn bawk a, midfield pakhatah Tielemans, Mainoo leh Baleba te an inkawp thei ang. Baleba hi ball chhuahpui thiam leh khingpui laka chhuhsak kawnga rintlak tak a nih avangin midfield-ah tha leh chakna a rawn belhchhah dawn a ni.
Fernandes hi thluak vawrh thiam leh khelmuala hmun awl zawng hmu thei a nih miau avangin tlarhma hmun khawiah pawh a hlauhawm reng dawn a. Midfield-a engkim ti tura captain Fernandes-a chauh an innghah tawh loh avangin, Old Trafford-a striker indaih lohna chu Carrick-a tan vanneihna kawngkhar a chang thei a ni.
