Aston Villa nen 4-4 a an inhnehtawk ṭuma Manchester United fan-ten mual a chhuahsan laia Portuguese full-back Diogo Dalot an lo au el (booed) chu head coach Michael Carrick chuan a player hi a thlawp tlat thu a sawi.

Old Trafford-a inkhelah hian second half-ah Dalot-a hi lakchhuah a ni a, a nambar laichhuah a nih aṭangin inkhel thlirtu mipuite an lo khek a, khelmual a chhuahsan chhung zawng khan an lo au el a ni. Bench a thlen hnuah Joshua Zirkzee chuan a lo kuah a, Zirkzee pawh hi kum engemaw zat liam taa Newcastle laka an inkhelh ṭum khan fan-te laka a thil lo tawn tawh tho a ni.

Match zawhah Carrick chuan Dalot-a chu a ṭha tak thu sawiin, kum 27 mi laka fan-te chêt dan avanga harsatna awm chu ngun takin a chhang a. International break zawha inkhel turah hian Dalot hi squad aṭangin a la chhuak dawn nge dawn lo tih erawh nemnghet duh lovin, a form chungchang erawh ngaihven hlawh tak a ni chho mek a ni.

Fan-te chêt dan chungchang zawhna chhangin Carrick chuan, "Hetiang thilah hian kan fimkhur a ngai hle a ni. Fan-te lungawilohna leh beidregna hi ka hrethiam em em a, ka pawm thlap a ni. Kan hrilhhai vek a, kan beidawng vek a, player-te pawh mipuite aia tlem lovin an beidawng tih ka tiam a che u," tiin a sawi.

Carrick chuan sawi chhunzawmin, "Diogo hian a theihna zawng zawng a hlan ṭhin. Position hrang hrangah a khel a, left-back-ah pawh a khel tawh a, vawi engemaw zat a che ṭha em em tawh a ni. Vawiin hian penalty a chhuah a, a tiṭha deuh hlek thei maithei, chu chu inkhelh pakhata tihsual nei thin a ni a, mahse club hi a ngai pawimawh em em a, a theihna zawng zawng a hlan ṭhin a ni," a ti.

Head coach chuan sawi belhin, "Team-a a rawn thlen, group chhung leh kan boruak atana a thawhhlawkna hi ka ngainat zawng tak a ni. Match lehah tu nge khel dawn tih leh team thlan erawh thutlukna dang daih a ni a, hmabak inkhel thar kan hmachhawn tur chu rilruah kan dah tawh zawk a ni," tiin a sawi.

Hemi rual hian Villa laka first half zawha Harry Maguire an lakchhuah tak avangin, Carrick chuan kum 33 mi defender hian half-time-ah a hnungzang kawng bawk (back spasm) a neih tak avangin khel chhunzawm thei a nih loh thu a sawi bawk a ni.