Kar liam taa Champions League inkhela Sabah an hmachhawn ṭuma chawlhtir a nih hnuah, Portuguese defender Diogo Dalot chuan Manchester Derby-ah Manchester United tana a match 250-na khelh tlinna chhinchhiah tlak tak a nei ta. He match-ah hian goal lut chungchanga VAR tihsual lian tak thleng karah United chu Manchester City laka 1-0-a an tlawm zui bawk a ni.
Kum 2018 khan he Portugal international hian Manchester United hi a zawm a, Italian club AC Milan lamah loan-in hun reilote hmang zawk mah se, tun hnai kum chhung zawng khan Old Trafford club tan hian ban pawimawh leh rinrawl ber zinga mi a ni chho char char a ni. Dalot hi tun dinhmuna United squad zinga match 250 khel tling thei mi panga chauh awm zingah a hming a ziah hnan ve ta hial a ni.
Dalot-a dawt leha tun dinhmuna United player zinga inlan hnem berte nena an inthlauhna pawh a lian hle a. A dawtah hian Argentina defender Lisandro Martinez (match 114) awmin, Kobbie Mainoo (match 107) leh Amad Diallo (match 97) ten an dawt bawk. Hei hian he Portuguese full-back hi tun hnai kum eng emaw zat chhung United squad-ah a lo rintlak tawk zia leh hmun pawimawh a lo luah tawh zia a pholang chiang hle a ni.
Manchester City nena an inkhelh hma chiah khan he hun pawimawh tak lawm nan hian Dalot hnenah chawimawina thilpek (special plaque) hlanna neih a ni a. United tana player anga match 464 lo khel tawh, club chanchina inlan hnem ber 17-na ni bawk head coach Michael Carrick-a nen thla an la dun bawk a ni. Old Trafford-a a awm chhung hian Dalot hian manager hrang hrang hnuaiah hun a lo hmang kual tawh a, club tana nomawi pahnih — kum 2023 Carabao Cup leh 2024 FA Cup — lakna kawngah pawh tha a lo thawh hlawk tawh hle.
He a hun chhinchhiah tlak tak a thlen hnu hian Dalot chuan a ngaihdan sawi chhuakin, "He hun chhinchhiah tlak ka thleng thei hi kan thiltum ber thlen nana penkhat dang leh a ni a, chu thiltum chu Manchester United jersey ha chunga nomawite chawi zel hi a ni," tiin a sawi.
Manchester United hian 2025-26 season khan bul ṭan chhe hle mah se, season ṭha takah an chantir thei a nih kha. Mahse tun 2026-27 season tharah erawh beisei angin bul an ṭan ṭha leh meuh lo va, Premier League title inchuhna kawngah hmahruaitu aiin point riat ngawtin an hnufual tawh a, he dinhmun aṭang hian engtin nge an insiamṭhat leh dawn tih chu United fan-te ngaihven ber a ni mek a ni.
