Manchester United number nine hlui Anthony Martial chuan free agent a nih mek laia a club zawm tur thlan fel hmain, Russian Premier League club pahnih bakah Spanish club ṭhenkhat nen inbiakna an nei mek niin L'Equipe chuan a tarlang.
Kum 30 mi Martial hian June thla tir khan Liga MX club Monterrey nena an contract chu inremtlang takin an titawp a, thla li dawn lai club nei lovin a awm tawh a ni. France international hlui hian Mexico club-ah hian kum hnih daih contract (kum khat dang pawhsei theihna telin) ziak mah se, a chanve chauh a hman hnuah a chhuahsan ta a ni. United-a a contract a zawh hnu khan Super League Greece champion AEK Athens-ah kum khat hun a hmang a, hemi hnu hian Rayados (Monterrey) hi a zawm leh a nih kha.
L'Equipe tarlan danin, Spanish club Malaga leh club dang pakhat hriat mai loh te chuan Martial hi an be mek a. Russia aṭangin CSKA Moscow leh Krasnodar te pawhin he kum 30 mi hi an ngaihven hle nia sawi a ni. Kumin nipui chhung khan French club Auxerre dawrna chu Martial hian a lo hnawl tawh bawk a; agent hrang hrang ten club dang hnenah a chanchin hi thehlut kual mah se, France aṭang chuan Auxerre chiah hi dawrtu tak tak awmchhun an ni. Hemi hma hian Lens leh Nice bakah, transfer window khar dawna striker mamawh em em Everton pawhin an lo ngaihven ve zawk tawh bawk a ni.
Foot Mercato tarlan dan phei chuan, Martial hian Libyan Premier League club Al-Ittihad Tripoli dawrna lian tham tak chu a lo hnawl tawh a ni. He Libyan club hian kum hnih chhungin hlawh fai £8.6million pek bakah, contract ziah man (signing bonus) atan £4.3million (a vaiin £13m dawn) thehchhuah an inhuam a, mahse he forward hian a pawm duh ta lo a ni. Al-Ittihad Tripoli hian tun thla tir mai khan Southampton winger hlui Sofiane Boufal chu an lo lalut tawh bawk.
Lorient sporting director Laurent Koscielny pawhin nipui transfer bazar chhung khan Martial hi lakluh tura an hnena thehluh zinga a tel ve thu a nemnghet a. Arsenal defender hlui Koscielny chuan Ouest-France hnenah: "Transfer window chhung khan player 400 aṭanga 450 bawr vel dawrna kan dawng a ni. Chung zingah chuan international player hlui tam tak an tel a, Anthony Martial pawh a tel nghe nghe," tiin a sawi. Koscielny leh Martial te hi kum liam ta chhung khan France national team tan vawi 13 lai an lo khel dun tawh a ni.
Old Trafford a chhuahsan hnuah Martial hian season hnih chhungin match 53 chauh a khel a. AEK tan match ṭhenkhat khelhin goal 9 a khung a, Monterrey tan erawh Europe lama a kir leh hmain goal khat chiah a khung hman thung. December thla tir hian kum 31 a tling dawn a, tun international break chhung hian a hmabak tur thutlukna siam fel a tum nia tarlan a ni.
Martial hian a hmain United aṭanga loan-in La Liga club Sevilla-ah a lo khel tawh a, Malaga hi Andalucia khawpui aṭanga mel 100 vela hla a nih avangin Spain lam chu a hre chiang hle. Chutih rualin Russia lama insawn erawh chu thil chiang lo leh chona thar lian tak a ni ang a, a chhan chu Ukraine an run avangin Russian club-te hi UEFA inelna hrang hrang khel thei lo tura hrem an nih mek vang a ni.
