Tun season-a Manchester United academy aṭanga loan-a chhuak zingah Jacob Devaney leh Chido Obi te hi nakina first-team-a inlan thei tura beiseina sang ber dawngtu pahnih an ni.
Devaney hi season liam ta khan St Mirren tan a khel ṭha hle a, Hibernian a zawm hnuah pawh a che ṭha chhunzawm zel a ni. Tun hnaia international break-ah pawh khan Ireland U21 tan England lakah tha a thawh hlawk hle a nih kha. Amaherawhchu, Jack Moorhouse-a awmna Dundee United nena an inhmachhawn ṭum khan hnawhchhuah (red card) a tawk hlauh mai a, mahse hei hi Netherlands lama Obi-a dinhmun nena khaikhawp chuan a la ṭha zawk fe a ni.
International break-a a chet ṭhat tehlul nen, Dundee United muala Hibernian an lenchhuah ṭum khan Devaney hian bul a ṭan lo a, bench aṭangin a ṭhu a ni. Dundee United hian 1-0 in hnehna an chang a, Devaney hi minute 77-naah midfield tihchak nan leh team tana tha thar pek tumin an luhtir a ni.
Mahse, khelmuala a luh aṭanga minute 7 chauh a liam tihin, Dundee attacker-in through ball hmanga goal lam a pan laiin Devaney hi defender hnuhnung ber dinhmunah a ding a. Attacker chu sir lama dan tum lovin, hnung lam aṭangin professional foul hmangin a pawt tlu a, referee tan pawh red card pek mai loh chu tih theih dang a awm ta lo a ni. Ball pawh a la khawih hman lo a, mi sawm ni chungin Dundee lamin goal dang khung belh lo mah se, he a thutlukna siam sual hi Devaney tan chuan theihnghilh mai a harsa ang.
Hei hi rawlthar ṭhan chhoh nana thil thleng ve bawk tur a ni a, Devaney hian harsatna a tawh hnuah pawh theihna a nei let leh vat ṭhin tih a lo lantir tawh bawk. Match hremna a hmachhawn hnuah a inlan leh thei chauh dawn a, a mizia enin United fan-te chuan player puitling leh ṭha zawk a rawn nih chhoh an beisei a ni.
Kawng lehlamah erawh, Willem II lama awm Chido Obi dinhmun chu a beidawnthlak hle thung. Dutch league hi Obi-a taksa len dan leh tharum neihte pholanna tur hmun ṭha tak nia ngaih a ni a, tlarhma forward-te tan goal khung teuh theihna hmun a ni ṭhin. Willem II pawh hi a kalna atan team fuh tawk tak tura ngaih a ni bawk.
Mahse a taka thil thleng erawh a danglam daih thung. Willem II an tlawm leh a, Obi-a inlan theih chhun pawh a beidawnthlak hle. A hma match-ah minute 8 chauh a khel a, Utrecht laka 3-1 a an tlawm ṭum khan minute 3 chauh khel turin bench aṭangin a rawn lut a ni.
Match hnih chhung leka minute 11 chauh chhawr chung hian Willem II manager hian he tlangval lakah hian eng nge a beisei tih hi zawhna lian tak a ni a, United lam tan pawh hriatthiam a har hle. Hetiang maia chhawr tlem an tum tih hria nise chuan United hian an kaltir lo tawp ang; a nih loh leh an hriat sa a nih chuan United hian he player hi an tichhe hle tihna a ni.
Benjamin Sesko-a hliam neih dan ngaihtuah phei chuan, Obi hian Old Trafford-ah pawh minute hetiang zat vel hi chu a khel ve thei hial zawk ngei ang. Obi hian match 5 chhungin minute 39 chauh a khel a, relegate mai tur dinhmuna ding team-ah hian hun harsa tak a paltlang mek a ni. Hei hi thil mak tak a ni a, United hian an player naupangte loan-a an chhuahtir hian club ṭha zawn chhuah kawngah an hlawhtling ngai meuh lo chu a ni e.
