Manchester United legend Wayne Rooney chuan a fapa kum 16 mi Kai Rooney-a'n United nena contract an ziah tak avangin, a hmingṭhatna leh a dinhmun chauh um a, a ṭhian nih tuma rawn hnaihtu an awm theih thu leh chu chu ngaihven ngai tak a nih thu a sawi.
Kum 11 a nih aṭanga United academy-a lo awm tawh Kai hian thla liam ta July khan club nen scholarship contract an ziak a ni. A pa hming a lian bera, rawlthar te a nih aṭangin mipui ngaihven a lo hlawh tawh ṭhin a. Mahse tunah chuan Old Trafford-ah ke a chak takin a pen ve ṭan ta a, ama pualin football kailawn a rap chho mek a ni.
Kai hi tun dinhmunah United Under-18 squad-ah a khel mek a, season liam ta khan FA Youth Cup match-a Derby County an hneh ṭum khan Old Trafford-ah a vawikhat nan a lo inlan tawh bawk. Disney+ docu-series 'The Real Rooneys' tih chhuah a nih hnu phei chuan he chhungkua leh Kai-a hming hi a lar zual sauh a ni.
Rooney leh a nupui Coleen te hian The Guardian nena an kawmnaah, an chhungkaw dinhmun leh boruak te an sawi a. United captain hlui hnenah hian ṭhian tak tak leh a dinhmun avanga rawn hnaihtute engtin nge an hriat hran ang tih an zawh chuan, hei hi Kai-a'n United-a a career a chhunzawm zui zelnaa an buaipui ngai tur pakhat a nih thu a pawm a ni.
Rooney chuan, "Kai-a'n Manchester United nena contract an ziah takah chuan hei hi kan hmachhawn tur chu a ni. A ṭhian tak takte chu kan hre hlawm a. United a zawm a, thutak hmanga rawn hnaih thut a, a ṭhian nih tum pawlah rawn inhuam an awm chuan kan lo hmu dawn a ni. Ṭhian thar siam theih loh tihna erawh a ni lo," tiin a sawi.
Kai hi Michael Carrick-a fapa Jacey nen United-in scholarship deal an ziahpui rawlthar pariat zingah an tel a, Professional Development Phase group-ah an inhlangkai tawh a ni. Hei hi a football career-a hmasawnna lian tak a ni a, a pa Rooney erawh chuan a fapa hian a pa hming leh chanchin ropui tak chhawm zui vang lova ama theihna ngeia he dinhmun hi thleng turin a duh em em a ni.
Show episode thumnaah Rooney Sr. chuan, "Kai hian ama pualin sulhnu hnutchhiah a duh a, kei chuan a thlawp nan ka awm reng ang. Ka duh loh ber chu keimah vang mai a he scholarship hi hmu a, contract ziak a ni. Ama theihna dik tak avanga hlawhchhuak ngei se ka duh a ni. Hei hi a lo chak tawh ṭhin em em a ni a, chuvang chuan he scholarship deal a hmu hi ka chhuang takzet a ni," tiin a sawi.
Scholarship contract hi player naupangte tana professional contract puitling ziah hmaa an thlen hnuhnung ber a ni a, kum 17 an tlin hnu aṭangin professional contract hi an ziak thei chauh ṭhin a ni. Kai hian thla lehah kum 17 a tling dawn tawh a, hetiang contract ziah pawh hi a inpeih ve tawh dawn a ni.
