Manchester United tantu Jamie Loveridge chuan an elpui lian Manchester City-in sum leh pai dan bawhchhiat avanga hremna an tawk tih lawm mekin hun a hman laiin, vanneihna ropui tak tawngin £3.5million man in ropui tak a dawng hlauh mai.

Kum 37 mi Loveridge hian Omaze prize draw hnuhnung berah London-a awm Victorian in mawi tak, mut pindan 5 awmna chu a dawng a ni. He inah hian naupang infahna treehouse, huan chhung wellness studio leh zip line te thlengin a awm kim vek a ni.

He football tantu rinawm hian Man City thubuai hremna an tawk tih hriatna te, a in thar man to tak te leh pawisa fai £250,000 a dawn belhte chu khaikhinin, "Kum 1999 hnu lama treble ropui ber a ni," tiin a sawi hial a ni.

Thla tin Omaze subscription atan £50 seng ṭhin Jamie hi tunah chuan a nupui Katie (34) leh an fapa pahnih Leo (10) leh Harry (8) te nen Worcestershire-a pindan pathum nei in satliah takah an khawsa mek a ni.

Tun kar chhunga a thil tawn mak tak chungchang sawiin Jamie chuan, "City hrem an nih thu kha tun kara chanchin lawmawm ber ka dawn tur a nih ka lo ring hman a, mahse chutah £3.5 million man in leh £250,000 pawisa fai ka dawng zui ta lehnghal a, vanneihna ropui tak a ni.

"City hrem an ni a, £3.5 million man in leh pawisa fai ka dawng bawk a - kum '99 hnu lama treble ṭha ber a tling hial ang. Ka dam chhung zawngin football fan ka ni tawh ṭhin a, mahse footballer-te chenna ang in mawi leh ropui ka nei ve ang tih hi ka suangtuah ngai miah lo," tiin a sawi.

Premier League financial rules bawhchhiatna thubuaiah independent commission chuan Manchester City chu an thiam loh a tarlang a, Manchester City lam hian he thutlukna hi an hnawlin appeal an thehlut zui thung a ni. Chutih rualin Jamie chuan, "Keini chhung chu kan fapa naupang ber tih loh chu United ṭantu hlir kan ni a, ani erawh Man City fan ruh tak a ni ve thung. A tan chuan tun kar chu a hrehawm ve hle ang, mahse zip line awmna in lian tak kan dawng hlauh hi chuan a ti hlim ve ngei ka ring," a ti bawk.

He in hi bat (mortgage) engmah awm lo, stamp duty leh dan lama senso zawng zawng chinfel vek bakah £195,000 man bungrua nena thuam thlap a ni. He vanneihna an tawn hma ni chiah hian Jamie-a pi chuan a boralsan a, an chhungkua an la lungngaih lai taka he chanchin hi dawng an ni.

Jamie chuan an pi boral chungchang sawiin, "In kan dawng tih kan hriat hma zan chiah khan ka pi kan chan a, chumi ringawt chu kan rilruah a awm a ni. A tuk maiah hetiang in ropui hi kan dawng ang tih kan ring pha lo hrim hrim. Ka pi hian van aṭangin he thil hi a rawn tihtir a nih hial ka ring a ni," a ti.

In an dawng tih an hriat ni hian naupangte chu football training hruai turin an inbuatsaih mek a. Omaze lam aṭanga phone an dawn hmasak chu Jamie hian a lo block hman hial a, mahse an rawn biak nawn leh takah chuan a nupui Katie-i'n a chhang ta zawk a ni. Naupangte training kal ṭhulh rih tura an hrilh hnuah, enge an dawn tih chu an va hmu chiang ta a ni.

Jamie leh Katie te hi kum 14 chhung lo inzui tawhin, October thla tawp hian an inneih champha vawi 6-na an hmang dawn a. Katie hi chhungkaw café-ah kum 18 chhung a thawk tawh a, Jamie erawh kum 16 a nih aṭangin fitness lamah thawk tawhin personal trainer-in a awm ṭhin a ni. An fate pahnih pawh football khelh tirin theihtawp an chhuah a; Leo hi Birmingham City tan a khel a, Harry erawh Cheltenham Town tan a inlan mek bawk.

Jamie chuan a tawp berah, "Katie leh ka fate tan hian nun ṭha ber pek hi ka duh ber a ni a, he thil vang hian ka suangtuah phak bakin ka ti thei dawn ta. Nitina sum leh pai vanga rilru hahna zawng zawng a bo nghal vek a, thil hlu leh ropui tak a ni," tiin a sawi chhuak a ni.