England Under-20 team-in 2-1 a France an hneh ṭum khan Manchester United academy midfielder Jim Thwaites chuan a ram tana a match hmasa ber (debut) a khel a, minute 77-naah bench aṭangin a rawn lut a ni.

Spain rama he inkhelah hian Southampton player Jack Robinson thlakin Thwaites hi a rawn inlan a. Hun reilote chhung chauh khelmualah hun hmang mah se, kum 20 hnuai lam ram aiawha a inlan hmasak ber a nih miau avangin rawlthar tan chuan chhinchhiah tlak thil pawimawh tak a ni. Manchester United lam pawhin social media lamah thuchhuah siamin, Thwaites-a hmasawnna chu chawimawina pek a nih thu leh a ram tana a vawikhat nan a inlan theih tak thu an tarlang bawk a ni.

He match-ah hian United academy chhuak player dangte pawh an inlan hnem hle a. Ayden Heaven leh Shea Lacey te chuan Young Lions bulṭantu (starting XI) zingah hmun an chang a, minute 60-naah Jack Fletcher chu a rawn lut bawk a, Harry Amass erawh bench-ah a ṭhu thung. Hei hian United academy theihna leh zikchhuak ṭhat zia a pholang chiang hle a ni.

Set-piece thiam tak leh ball sem zung zung kawnga theihna sang tak nei Thwaites hian United Under-18 leh Under-21 team-ah a theihna a lo pholang tawh ṭhin a. Tun season chhungin match li a khel tawh a, UEFA Youth League-a Sabah an hneh ṭum khan goal luhna tur vawi hnih (assist) a siam bawk. Hemi avang hian England Under-20 tana koh a nihna leh a inlan theihna hi United chhungril tana hmasawnna lawmawm tak a ni.

First-team a luh nghal theihna dinhmun a la thlen loh pawhin, United youth rank-ah player ṭha leh rintlak an ngah tawk zia he inkhel hian a tarlang chiang a. Heaven, Lacey, Fletcher leh Amass te nen England squad khatah United rawlthar ṭhahnem tak an inlan thei hian club huangchhung boruak ṭhat zia a tilang a ni. Club level-ah pawh inelna a sang chho zel a, United Under-21 team chuan Premier League 2-ah Brentford an hmachhawn dawn bawk. Chutih rualin, club chuan rawlthar lakluh belh zelin Isaac Konde chu an senglut fel bawk a ni.

Thwaites-a tan chuan England Under-20 tana a inlan hmasak ber hi a thleng chho ta a. United youth team hrang hranga rintlak a nihna leh game thunun thei khawpa a theihna neih chu ram tana jersey hak theihna hmangin chawimawi a ni chho mek. Hetih rual hian khelmualah minute tlemte chauh la inlan a nih avangin hmasawn zel tura ṭan lak a la ngai dawn a ni.

England hian Inrinni hian Germany an hmachhawn leh dawn a, he inkhelah hian Thwaites tan hun tam zawk khelh theihna chance a inhawng leh dawn a ni. France laka bench aṭanga a luh hnuah Germany lakah pawh inlan leh ngei a beisei ang a, bench-a ṭhu Amass pawhin khelh theihna hun remchang a melh ve bawk ang. Thwaites-a tan chuan a ram tan minute engzat pawh pe se, khelmuala hun a neih chhung chu a theihna zawng zawng thehchhuah chu a thiltum ber a ni rih dawn a ni.