Lionel Messi tel lova hun thar an hmang ṭan chho mek Argentina chuan Bolivia chu 4-0 ngawta an sawp ṭumin, Manchester United centre-back Lisandro Martinez chu bul ṭantir a ni a. Match a fel tawh hnu minute 81-naah lakchhuah niin, he inkhelah hian hna hautak tak tawk lo mah se khelmual chhungah tihsual nei miah lovin a che ṭha hle a ni.

He inkhelah hian Bolivia lamin tlarhma lamah hlauhawm an siam meuh lo va, Argentina lamin inkhel an thunun hneh em em a. Chuti chung chuan Martinez hian buaina tlem te chauh tawk chungin a mual venna lam chu a khar phui hneh hle. Inkhelh chhungin ball vawi 86 zet a khawih a, pass vawi 80 a neih aṭangin 72 a pe dik bawk a ni. Ball a khawih tam bakah hian ball a neih loh laia a chet vel dan leh khelmuala a dinna hmun thlan thiam dan chuan mi a hneh zual hle.

Argentina-in hnehna ropui an chan hnu hian, an ram tualchhung chanchinbu hrang hrangte chuan Martinez-a chet dan chu an sawizui nasa hle a. Tlarhnung lama buai lutuk lo mah se a khelh dan chu an fak tlang hle a ni.

Bolivia lamin tlarhnung tibuai tham khawpa hlauhawm an neih meuh loh laiin, TYC Sport chuan a thawk ṭha hle tih tarlangin, "Hna thawh tur tam lutuk lohna match a ni a. Lisandro hian ama bial chhung leh tumpuite mual chhung thlengin ke a chheh dik em em a ni," tiin a khelh dan chu an fak a ni.

La Pagina Millonaria pawhin an thlawp thu tarlangin, "Defensive lamah phut a tlem hle. Hnung lam aṭanga pass dik tak hmanga game chhem alh kawngah thawhhlawk tak a ni," tiin an thlirlet a. Amaherawhchu, hmun hlauhawm laiah vawikhat chu ball a hloh hlauh a, goal chhuah theihna chance a siam phah teuh hle tih an sawisel tel bawk.

Bola VIP pawhin ball a neih lai leh a neih loh laia Martinez-a chet vel dan chu tha an ti hle a, match rating 6/10 chauh pe mah se, "Hma lam nawr leh inven kawngah a mit a fing hle a. Ball chhuhsakin khelmual a thunun hneh em em a ni," tiin an ziak bawk.

Clarin lam pawhin Martinez-a pass theih zia chu fak bawkin, "Tlarhnung lama hna a tam loh laiin, hmalam pana ball thuk tak tak (in-depth passes) pek kawngah a mizia pangngai angin a inrawlh tam hle," tiin an tarlang ve bawk a ni.

Argentina chanchinbu hrang hrangte ngaihdan leh thlirlet dan aṭang hian, Martinez hi inkhelh chhungin hna harsa leh hautak lutuk hmachhawn lo mah se, a theihna phochhuah a ngaihna apiangah chuan professional tak leh rintlak takin a che chhuak a ni tih an ngaihdan a inang tlang hle a ni.