VfB Stuttgart centre-back Finn Jeltsch chu Manchester United bakah Europe club lian dangte'n an thlithlai (monitor) mek nia tarlan a ni a. Mahse, German chanchinbu Fussball News-in a tarlan danin, Bundesliga club hian kum 20 mi defender chungchangah inbiakna hawng tur chuan €50million aṭanga €60million bawr vel an phut dawn niin a tarlang.
Tlarhnung thuamchakna tur zawng mek Red Devils tan hian he rawlthar hi tlarhnung tana rawtna pakhat atana chhawpchhuah a ni a. Tun dinhmunah chuan dawrna puitling (bid) emaw inremna engmah a la awm lo a, club lamin uluk taka an enthlak leh chanchin an lakkhawm (scouting) lai mek chauh a la ni.
Fussball News tarlan danin, Jeltsch hi Real Madrid, Bayern Munich, Arsenal, Liverpool leh Manchester United te chuan an thlithlai reng a ni. Heng zinga Arsenal, Liverpool leh United te phei chuan khelmualah ngei vawi engemaw zat a khel lai an va thlir tawh a, a hmasawn dan leh a theihna uluk takin an zirchiang mek bawk. Real Madrid erawh chuan hla deuh hlek aṭangin a chanchin an ngaichang thung nia hriat a ni.
United hian tun hnaiah tlarhnung lam thuamchak nan Matthijs de Ligt, Leny Yoro leh Ayden Heaven te lalut tawh mah se, an tlarhnung buaina hian a la zui reng a ni. De Ligt chu a hnungzang hliam vangin thla 10 dawn khelmual a chhuahsan a ngai a; Red Devils hian tun season Premier League match nga an khelh tawhah goal riat ngawt chhuahin, vawikhat mah clean sheet an la nei lo a ni.
Jeltsch hian Stuttgart-ah hian kum 2030 thleng daih contract a la nei a, chuvangin January transfer window laia a chhuah theihna chu thil theih loh tluk a ni hial a, dawrna takngial pawh an la dawng lo. Hetianga contract nghet tak a neih avang hian United pawhin player pakhat chauh umzui buai lovin, tlarhnung player dang lakluh theih awmte pawh an bihchiang kual mek a ni.
€50-60 million an chhiar bakah hian, Stuttgart hian a chet ṭhat dan azira pawisa pek belh tur (bonuses) leh nakina hralh chhuah leh a nih pawha a man aṭanga chanvo (sell-on clause) an beisei tel ngei bawk a rinawm. Chuvangin sum tam tham tak nena dawrtu an awm tehhrep loh chuan, kum 2027 nipui thleng tal chu Jeltsch hian Stuttgart a chhuahsan a rinawm loh hle.
Premier League-a tawn hriat la nei lo a nih avangin, United hian hetiang zata sum tam hi an thehchhuak nghal mai ang em tih erawh sawi theih a la ni lo; a bikin INEOS lamin centre-back dang ngaihven an neih nual lai phei chuan a la hma deuh hret a ni. Tun dinhmunah chuan Jeltsch hi dawr zui nghal chuk chuk aiin, an player enthlak mek zinga mi chauh a la ni rih a ni.
