Manchester United Women head coach Eva Olid chuan mahni muala Chelsea laka 5-0 ngawta an tlawm hnuah, player-te leh coaching staff-te inkarah tlang tak leh dik taka inbiakna an neih chu team insiamṭhat theih nan thil pawimawh tak a nih thu a sawi chhuak a. Pathianni, October 18 hian The Valley mualah Charlton Athletic an hmachhawn leh dawn a ni.

United enkawltu Olid-i chuan heng inbiakrawnna an neihte hi player-te leh staff-te'n an inlungrual theih nan leh an inman thiam theih nana inthlakthlengna ṭan chhuahna a nih thu a tarlang a. International break zawh hnua The Peoples Person-in an tarlan danin, match hmachhawn tura an inbuatsaihna press conference-ah Olid-i hian team dinhmun hi a sawifiah a ni.

Pre-season laklawh laia team enkawl ṭan a nih bakah coach danglam kualte avangin a ṭan tir lam chu thil awlsam a ni lo tih he head coach hian a pawm a. United hian season bul an ṭan tirhin London City Lionesses lakah 2-1 in an tlawm phawt a, chumi hnuah mahni mualah Chelsea lakah 5-0 ngawtin an tlawm zui leh a nih kha. Mahse, khualmualah Arsenal chu 1-1 in an inhnehtawkpui a, hemi hnu aṭang hian a zawna vawi li hnehna chang chhoin an insiamṭha zui ta a ni.

Heng an match li hnehna an channa zingah hian WSL Cup-ah Sheffield United chu 10-1 in an sawp a, West Ham lakah 2-1 in hnehna an chang a, cup-ah Durham chu 5-1 in an hneh leh a, league-ah Liverpool chu 1-0 in an hneh bawk. Hei hian league match-ah a zawnin vawi thum hnehna an chan theih phah a ni.

Olid-i chuan, "Chelsea nena kan inkhelh zawh khan tlang takin kan inbe dun a, Arsenal laka kan khelh dan leh a hnu match-ahte khan kan danglam chhoh dan chu in hmuh theih ngei ka ring. Tunah chuan kan inpumkhat zual tawh hlein ka hria. Hei hian nitin match kan tiṭha reng dawn tihna chu a ni lo na a, mahse kan inman tawnin kan inhrechiang tawh hle a ni," tiin a sawi.

International break chhung khan Olid-i hi Manchester-ah a cham zui a, chawlh satliah atan hmang lovin staff-te mawhphurhna leh hna thawh dan siksawi nan hun a hmang a. Thil thar nena phur thara bul ṭan leh nan he chawlh hi a ṭangkai hle tih a sawi bawk. Coaching staff zingah mize hrang hrang leh theihna inang lo nei kawl chu ṭha a tih thu sawiin, José Herrera chu rilru inang tak pu leh tactics lama thiamna ngah tak a nih thu a fak bawk a ni.

Player-te dinhmun chungchangah, Olid-i chuan Zirtawpni khan Carrington-ah an rawn kir ṭan chauh avangin hliam thar nei an awm leh awm loh a la fiah kim chiah loh thu a sawi a. Amaherawhchu, an captain Maya Le Tissier chu a ram tan goal a khung hmasak ber avangin rilru phur tak chungin a lo kir thu a tarlang. Olid-i hian Le Tissier-i khel lai a thlir thu leh tlar hma lama inrawlh a nuam a tih thu an sawidun thu a sawi a, mahse a khelhna pangngaia chhawr a la duh zawk thu a sawi lang bawk a ni.

Sunday-a an hmachhawn tur Charlton Athletic lakah fimkhur a ngaih zia sawiin, khingpui lam pawhin chawlh an neih hnuah theih tawp chhuaha an vawi khat hnehna chan tumin an rawn bei dawn a, United pawhin match harsa tak an hmachhawn dawn tih hriaa an inpeih a ngaih thu Olid-i chuan a chah a ni.