Everton icon Duncan Ferguson chuan khelmuala player nunrawng leh luhlul (hardman) anga hming a lo neih tawh ṭhinna chuan manager hna a zawnna kawngah nasa takin a tibuai nia a ngaih thu a sawi chhuak. Kum 54 mi Scotland international hlui hian kum 2022 khan Championship club Middlesbrough enkawl hman teuh hle mah se, Michael Carrick-a'n a rilru a thlak thut avangin a chang ta lo tih a sawi bawk a ni.
Ferguson hian a professional career-ah Premier League-ah kum 12 zet a hmang a, chung zinga kum 10 chu Everton tan Goodison Park-ah hun hrang pahnihah a hmang a ni. Kum 2019 khan Toffees interim manager niin coaching lamah a vawikhat nan a inrawlh a, kum 2022 pawh khan Everton lailawk enkawltu hna hi a lo chelh tawh bawk. Hemi hnu hian Forest Green Rovers leh Inverness Caledonian Thistle te enkawlin, tunah hian NIFL Premiership club Glentoran head coach hna a chelh mek a ni.
The Telegraph hnenah inbiakna a neihnaah, a khelmual nun chhung zawnga red card vawi kua ngawt hmutu striker hlui Ferguson hian manager hna a zawn kawngah a mizia hluiin nghawng a neih theih dan sawiin: "Kha thil kha chu ka pumpelh thei tawh lo. Khatiang kha khelmuala ka football khelh dan ve hrim hrim a ni a, mahse khelmual pawnah chuan ka in rawk tumtu i nih loh phawt chuan chutiang mi chu ka ni lo! Liverpool-ah hian kum 22 mi ka nih aṭangin ka awm tawh a, mi ṭha lo tak ni ila chu man chhuah ka ni daih tawh ang," tiin a sawi.
Kum 2022-a Middlesbrough enkawl tura a dinhmun a ṭhat zia sawi zelin Ferguson chuan, "Kha thil piah lam kha an thlir thiam lo a ni maithei. Kum hnih vel liam ta khan Middlesbrough manager hna kha ka chelh teuh hle a ni. Michael Carrick khan a duh loh thu a lo sawi tawh a. Interview-ah khan ka tling chiang em em a, min kawmtu mi pahnihte pawh khan hna chu min pek an duh thu min hrilh hial a, mahse neitu Steve Gibson biak phawt an ngai thung a ni.
"Hna chu ka hmuh ngei ka inbeisei tawh hle a. Mahse ni tlemte a liam hnuah, sporting director-in phone hmangin min rawn bia a, 'Chanchin lawmawm loh kan nei tlat mai,' a rawn ti a. Carrick chuan a rilru thlakin Gibson-a hnenah hna chu a duh leh si thu a lo va hrilh a, tichuan anni pawhin amah chu an thlang ta zawk a ni," tiin a sawi.
Ferguson hian thla liam ta khan Glentoran-ah bul a ṭan a, Coleraine lakah 1-1 in khualmualah an inhnehtawk a ni. He hna a lak hian senso a tam hle tih pha lo mah se, football enkawl leh theihna hunṭha chu a hnar phal tawh loh thu a tarlang. "Helaia lo kal tur hian thil tam tak ka kalsan a, mahse hunṭha tak a ni. Club ropui tak a ni a, mi ṭha tak tak an awm bawk. Touchline-a i awm tawh chuan Big Sam-a sawi ang deuh khan: 'Chak chu chak a ni mai'. Inrinni apianga point thum i hmuh chuan, a eng level pawh nise i hlim em em a; i chak loh erawh chuan a hrehawm ngawih ngawih ṭhin.
"Hna thawh hi nuam ka ti em em a. Football huang pawna i awm chuan ni khat lek pawh hi thla khat ang maia rei a ni ṭhin. Nitina hna thawk ṭhang i nih laia in lama i ṭhut mai mai chuan, kar khat lek pawh kum khat tluk hiala rei a nih ṭhin avangin awm mai mai a har a ni," tiin Ferguson chuan a sawi bawk a ni.
