Manchester United chuan an rawlthar theihna ngah tak JJ Gabriel-a'n club-a a inziahluhna (registration) tihtawp a ngenna thehluh chu an hnawlsak a, mahse he kum 15 mi forward hian Barcelona nen inbiakna an neih mekah Old Trafford chhuahsan a hnaih tawh hle nia hriat a ni.
Tun kar khan Gabriel-a aiawhtute chuan United aṭanga de-register tura ngenna lehkha hi an thehlut a, mahse club lamin an hnawlsak a, he rawlthar hi Old Trafford-a la chelh hram tumin theih tawp an la chhuah mek a ni. Mahse, United beiseina hi a beidawnthlak chho tial tial nia hriat a ni a, Gabriel leh a chhungte bakah a aiawhtute chu tunah hian Spain-ah awmin, Barcelona bakah thla thara insawn theih dan kawngah Real Madrid nen pawh inbiakna an nei maithei bawk.
United hian tun season tawp thleng Gabriel hi contract hnuaiah la kawl mah se, October ni 6-a kum 16 a tlin hnuah EU passport a neih theih phawt chuan ram dang club-a insawn theihna FIFA dan (loophole) remchangah lain Barcelona emaw Real Madrid emaw hi a zawm thei tura ngaih a ni. A pa hi Ireland rama inzawmna nei a nih bakah a nu hi Cyprus mi a nih bawk avangin, EU passport hi a nei thei dawn nia hriat a ni a, Spain chanchinbu tarlan danin kar thar chhung hian he transfer tihfel theihna lehkha pawimawhte chu a nei fel tawh mai thei a ni.
Hetiang a nih chuan United hian dan theihna an nei tlem hle dawn a, inremna siam tur hian FIFA pawmpuina erawh lak a ngai thung ang. United hian a kum 16 tlin niah scholarship contract an chhawpsak thei ang a, club a chhuahsan ngei dawn nia a lan tawh miau avangin hetianga an tih hian zangnadawmna (compensation) tlem a zawng tal chu an hmuh theih phah ang.
Tun kara Gabriel-a'n chhuah a dil thutna hian United hotute a ti-bangbo hle a. Ningani liam taa UEFA Youth League-a Sabah lakah hat-trick a khung hnu aṭang khan Carrington training ground-ah he rawlthar hi a la inlar leh tawh lo a ni. Nilainia Brighton an hmachhawn ṭum khan Gabriel hi squad-a telh tura first team nena training nei tura ruahman a ni a, inkhelah hian inlan se chuan United chanchina senior team-a khel thei naupang ber a ni hial dawn a ni.
Gabriel-a aiawhtute chuan United hian senior team-ah telh an tiam ṭhin chu an bawhchhe niin an ngai a, hei hi club chhuahsan an duhna chhan ber a ni. Pre-season chhung khan first team tan minute riat chauh a khel a, club Champions League squad aṭangin paih a nih bawk avangin kar liam taa Sabah laka a debut match tur pawh a khel thei ta lo a ni.
Fulham an hmachhawn hmaa press conference-ah head coach Michael Carrick chuan he rawlthar dinhmun chungchang an zawhna chu chhangin, kum 15 mi a nih anga enkawl leh venhim a pawimawh thu a sawi lang. Carrick chuan, "Nimin lamah pawh ka lo sawi tawh angin, rawlthar naupang te a la ni a, JJ hi mipuite hmaa sawi vak loh hi a pawimawh berin ka ring.
"Mipuite titi leh endikna hmachhawn a ngaih ṭhin avangin fimkhur a, ngaihtuah thiam a ngai a, a tan ṭha ber tur ngaihtuah hmasak ber a ngai a ni. Eng kawng pawhin he dinhmun hi a la insiamrem chho mai ang. A ṭha tawk em tih hriat chian hi thil pawimawh ber chu a ni," tiin a sawi.
