Manchester United striker Joshua Zirkzee tan chuan kumin hi hun nuam zawk zawk a ni lo chiang hle.
He Dutch striker hi Erik ten Hag, Ruben Amorim leh Michael Carrick-a te hnuaiah first-team hmun nghet a chan theih meuh loh avangin, kumin nipui bazar chhung khan Old Trafford chhuahsan mai tura ngaih a ni tawh a. Ball khawih thiamna leh theihna nei ṭha hle mah se, Red Devils tana tlarhma hmahruaitu ber nih chu a la inhmeh tawk loh hmel ṭhin hle a ni.
Hei vang hian kumin nipui khan hralh mai tura ngaih a ni a, transfer deadline day phei kha chuan Everton a pan ṭep hman a, mahse a tawp khawkah an inremna chu a ṭhulh leh ta hlauh a nih kha. Hetiang a nih tak avang hian January transfer inhawng leh tura chhuak mai thei tura sawi a ni chhunzawm a, tun season chhungin United tan inelna hrang hrangah match 4 chhungin minute 70 chiah khelmualah hun a la hmang a ni.
Striker Benjamin Sesko chu hliam vangin season ṭan tirh lamah a inlan thei lo fo chung pawhin, Zirkzee hian United-ah hmun a chang tam thei chuang lo a ni. Mahse, hliam vanga Brian Brobbey-a chawlh tak avanga Netherlands squad-a koh luh a nih hnuah, ram tan erawh inkhelhna hun a nei ṭha ta thung.
Serbia nena Nations League match an khelhah Zirkzee hi second half-ah bench aṭangin a rawn lut a, 2-1 a Netherlands an chak theih nana goal pawimawh ber chu a rawn khung ta a ni. Box chhungah striker dik tak tih tur hai lovin, hnai te aṭanga ball cross rawn kal chu mawi takin a lo chantir a, an Nations League group-ah point thum hlu tak an hlawhchhuah phah ta a ni.
Minute 45 khelmuala a hun hman chhung hian Zirkzee hian goal a khung bakah key pass vawi khat a nei a, a pass hlawhtlin zat hi 63% chauh ni mah se, a long ball vawrh chhuah zawng zawng (100%) chu a thleng dik vek thung. Chu mai bakah, tlarhnung venhim kawngah puiin clearance vawi khat a nei a, an ram tan ball a chhuhsak bawk a, boruaka innuaina (aerial duel) vawi khat a chak bawk a ni.
Hetianga ram tana bench aṭanga rawn lut a theihna sang tak a rawn pholang leh ta hian, Manchester United boss Michael Carrick tan tlarhma striker chungchangah ngaihtuahna thar a siamsak ngei a beiseiawm hle a ni.
