Premier League match nga an khelh tawhah point nga chauh hmuin, inelna hrang hranga match sarih an khelh tawh zinga vawi hnih chiah hnehna an la chan avangin, Manchester United chuan beisei a phak lo hle a, season bul an ṭan ṭha lo hle a ni.
Season liam ta chanve hnuhnung lama Michael Carrick-a hnuaia boruak ṭha tak an neih chhoh kha, tun hnaia an khelh chhiat zawn tak em avang leh an theihna phak lova an chet tak zut avangin a reh chho tial tial a. Vanduaina eng emaw zat tawk ve bawk mah se, United inkhelh dan hi a phurawm lohvin sawiselna a hlawh hle a ni. Hull City leh Brighton laka an tlawm khan ngaihṭhatlohna a siam a, international break hma chiaha Fulham an tlawh ṭum pawhin Matheus Cunha-a'n hun tawp dawnah goal a khung hram avangin 1-1 in inhnehtawk mah se, an khelh dan phungah beiseina tur a tlem hle a ni.
Hemi rual hian hliam vangin Carrick-a tan player indaih lohna a rawn chhuak ṭan bawk a, mahse international break zawh rual hian match lian pali an hmachhawn nghal dawn avangin he hun hi club hmabak hril fiah theitu tur pawimawh tak a ni dawn a ni. Inrinni hian Old Trafford-ah Roberto De Zerbi-a enkawl, table mawngphah lama awm mek Tottenham an mikhual dawn a, chumi hnuah form ṭha tak nei Leeds United an luhchhuah ang a; Champions League away match harsa pahnih Atletico Madrid leh Como muala an khelh turin a karcheh bawk a ni.
Boruak ṭha lo hi thlak danglam turin Carrick hian enge a tih theih ang? He dinhmun siamṭha thei tur hian thutlukna leh siksawi theih thil pathum a nei a ni:
1. Carlos Baleba chhawr nghal:
Craven Cottage-a Fulham an tlawh ṭum khan £70million man Carlos Baleba hi bench-ah dah niin a inlan lo a, mahse matchday squad-ah a tel hrim hrim pawh kha a lawmawm hle. International break zawhah debut a siam ngei tura beisei a ni sa a. Inrinni a lo thlen meuh chuan training session ṭha tak a nei tling tawh dawn a, Zirtawpni khan Carrington-a inkhelh thup (behind-closed-doors)-a Lausanne-Sport an hmachhawn ṭum pawhin minute eng emaw zat a khel hman tawh bawk. Chuvangin Spurs lakah hian bul a ṭan nghal mai a rinawm hle. A chakna, a phurna leh khelmual a luah hneh theihna te hi tun dinhmuna United mamawh tak a ni a. Kobbie Mainoo nen an inkawp a nih chuan Mainoo hian hmalamah thlamuang zawkin a nawr theih dawn bakah, Carrick-a'n rang thei ang bera a chhawr ṭan a ngai a ni.
2. Tlarhma laili siksawi:
Striker Benjamin Sesko-a'n a chawnruh (shin) a tihliam thar leh hi United tan manganna lian tak a ni a, a chawlh rei dawn phei chuan Carrick-a tan buaina a tling ang. He Slovenian striker hi an squad-a No. 9 pangngai awmchhun a ni a, a inlan theih loh chuan tlarhma siksawi a ngai dawn a ni. Tun thlengin Premier League match tina false nine anga inlan Matheus Cunha an hmang ṭhin a, mahse tlarhma chet dan hian beisei a phak lova, goal hlauhawm siam kawngah hma an sawn meuh lo. Chinfelna ṭha famkim a awm rih lo a nih pawhin, season liam taa No. 9 anga khel ṭha tak Bryan Mbeumo chu chhawr theih a ni ang. Pre-season-ah pawh Stockholm-a Atletico Madrid laka goal hnih khungtu Mbeumo hian Sesko leh Cunha te khelh dan karah United tlarhma tan goal khung hlauhawmna a thlen theih zawk a rinawm a ni.
3. Academy star Shea Lacey hman:
Mbeumo hi tlarhma laili-a a insawn phei a nih chuan mual dinglam sir (right wing) a ruak dawn a. Amad chu training-ah kir leh tawh mah se, Lausanne-Sport nena an inkhelhah khan a inlan ve hmel lohva, kar tharah a la inpeih lo maithei a ni. Chutih hunah chuan Carrick hian Carabao Cup-a Brighton laka che ṭha em em kum 19 mi Shea Lacey chu a chhawr thei a ni. Lacey-a huaisenna leh inrintawkna sang tak hi United tana tha thar hlu tak a ni thei ang. Chu chuan Cunha leh Marcus Rashford te chu veilam sir luah turin a inel tir theih phah dawn a, match harsa tak tak a zawn zata an hmachhawn chhoh turah player inthlak kual (rotation) kawngah Carrick-a tan duhthlan tur a tam phah bawk ang.
