Manchester United-a centre-back awmsate dinhmun thlirin, head coach Michael Carrick-a'n he position-ah hian thawmṭhat a mamawh zia a lang chiang hle.
Matthijs de Ligt chu nikum November thla aṭang khan khelmual chhungah a la inlan thei meuh lo va, first team-ah a rawn kir chho ṭan chauh a ni. Hun rei tak a chawlh hnuah he Dutch defender hian a theihna tak tak a chhuah leh thei nghal ang em tih chu rinhlelhawm tak a ni. Harry Maguire-a kum a tam ve tawh avangin kar khata match tam tak khelh chu a taksain a tlin tawh meuh lo va, Lisandro Martinez-a hliam neih ngun lutuk leh a contract chungchang avangin club-a a hmabak a la chiang lo hle bawk. Ayden Heaven leh Leny Yoro te lah khawvel hriata player ropui ni turin hun an la mamawh rih a, chuvang chuan INEOS chuan nakkum lamah an defence laili thuamchak ngei an tum ruh hle a ni.
Fussball News tarlan danin, Amex Stadium-a a khelh ṭhat em avangin Red Devils chuan kum 19 mi Brighton defender Luka Vuskovic chu an lak tum zinga mi atan an ngaihven ve ta a ni. Carabao Cup-a Old Trafford-a an inhmachhawn ṭum khan, Brighton & Hove Albion tana a khelh dan chuan United scout-te a barakhaih hle a, an mit a la em em a ni.
He Croatia international hian tun season chhungin clean sheet vawi nga lai a nei tawh a, a taksa len bakah ball thunun a thiam em avangin defender duhawm tak a tling nghal der a ni. Mahse, English league-a vawi 20 champion tawh United tan hian lakluh a awlsam dawn lo tawp mai, a chhan chu Premier League leh Europe-a club lian tam takin he Croatian rawlthar hi an thlithlai ve bawk a ni.
Thudawnna chuan, "Tlarhnung vengtu lian leh tha ngah tak Luka Vuskovic hi Liverpool, Manchester United, Bayern Munich, Real Madrid leh Atlético Madrid te chuan uluk takin an thlithlai mek zel a. Kumin nipuia Vuskovic lo hralhtu Tottenham pawhin an la ngaihven chhunzawm reng bawk a ni.
"Tun dinhmunah Brighton hnenah lehkha hmanga dawrna puitling thehluh a la awm lo va, club leh club inkarah pawh tlang taka inbiakna a la awm lo. Live scouting, a khelh dan thlithlai leh player zirchianna (analysis) kalpuina hun chauh a la ni rih.
"Virgil van Dijk-a hnu lama an tlarhnung remṭhat nana player pawimawh ber tur zinga mi atan Liverpool pawhin he Croatian defender hi an dah a ni. Chu mai bakah, Old Trafford-a EFL Cup-a an inhmachhawn ṭuma a khelh ṭhat em avang khan, Red Devils-in an player lak duh list-ah an telh zui nghal bawk a ni," tiin a tarlang.
Brighton (Seagulls) lam chuan an club-a a luhna a la rei loh avangin he player hi hralh an la phal meuh lo va, sum tam tak seng hial tura record fee thehlut an awm a nih ngawt loh chuan hralh mai an tum lo hle. Hei bakah hian Spurs lamin let leh theihna clause (buyback clause) leh an hralh leh a nih huna sum dawn tel theihna (sell-on fee) an neih tel avangin, he rawlthar inchuhna hi a harsa telh telh dawn niin a lang.
