Carlos Baleba chu kumin nipui bazar chhung khan Ineos hnuaia Manchester United player lakluh lian ber (marquee acquisition) ni mah se, tun thlengin inelna tak takah United tan a la inlan thei lo a ni. Kum 22 mi Cameroon international hian Old Trafford a pan hmaa Brighton nena pre-season an hman laia a kerek hliam tawrh chu dam chhohpui tumin ṭan a la mek a ni.

August thla khan United chuan Baleba man atan hian £70m thleng sêng turin inremna an siam a, transfer window khar hmaa Red Devils player lak thar hnuhnung ber a ni bawk.

Baleba hi kum 2025 daih tawh khan United nen hian lo sawizawm tawh an ni a, mahse khatih lai khan £100m chuang seng tura Brighton lamin an phut avangin United chuan an ngaihven zui ta lo a nih kha. Cameroon international hian Brighton tan 2025-26 season chhung khan chet ṭhat leh ṭhat loh chang nei mah se, season a kal chhoh zel rualin a theihna a rawn pholang leh thei a ni.

Kum 2023 khan Moises Caicedo-a'n Chelsea a pan hnuah, Brighton chuan French club Lille aṭangin Caicedo-a thlaktu tur atana rintawk takin Baleba hi an lo la tawh a ni. Season liam ta khan Amex Stadium-ah dinhmun nghet luah hleithei lo mah se, United chuan 2026-27 season atana Michael Carrick-a first-team squad thuamchak nan he midfielder hi an lak luh tum ber zinga mi a ni chhunzawm ta tho a ni.

The Athletic podcast 'Talk of The Devils'-ah reporter leh presenter Ian Irving chuan United a zawm hmaa Brighton-a Baleba-a hun hman dan a sawichhuak a. Amex Stadium-a a awm chhung khan Baleba hi mi zahzum leh zawi tak (very shy) anga hriat a nih thu a puangzar a ni.

Irving chuan, "Baleba chungchangah hian Brighton-a a thawhpuite, tun kar chhunga amah an kawmnaa lo awm ve mi engemaw zat ka biakna aṭangin, a la naupang em em a, a zahzum hle a, a khawsak phung en pawhin a zawi hle tih an sawi. Mahse player theihna sang tak inphum a awm tih a chiang a, chu chu Premier League-a Brighton tana a khelh chhung khan kan hmu tawh reng a ni," tiin a sawi.

United zawm hi Baleba-a career-ah chuan hun pawimawh tak a ni a, United manager Michael Carrick-a hnuaiah he Cameroon international hian a theihna tak tak a pholang chho thei ngei ang. Carrick hi a khelh laia midfielder fing leh mi fak hlawh tak a lo nih tawh avangin, Baleba-a mize zahzum tak chu Old Trafford-a khelmual thunun thei player (commanding player) nihnaa chher puitling turin zirtirtu ṭha ber a ni.

Baleba-a dar chungah hian beiseina a sang hle a, midfield lailiah Kobbie Mainoo nena an inkawp dan tur pawh mipui ngaihven ber tur a ni dawn a ni. Amaherawhchu, Old Trafford hi Baleba tan chuan player puitling zawka a ṭhanlen theihna tura hmun remchang ber a ni a, a kum a lo upat chhoh zel rualin a puitling chho ngei bawk ang.