Manchester derby inkhelh laia Manchester City star Phil Foden-a hnawhchhuah a nih theih nana a chet dan avangin, Manchester United captain Bruno Fernandes pawh yellow card hmuh tir ve awm a nih thu sawi a ni.

Old Trafford-a City-in si khat faia (1-0) hnehna an chan ṭum khan, first-half chhungin Foden chuan straight red card a hmu a, hemi hnu hian Erling Haaland chuan sawizui hlawh tak chakna goal a khung zui a ni. United captain Fernandes-a'n a tihthluk hnuah Foden hian a chhir let a; mahse video letleh enletnaah erawh Foden-a chhir hma hian Fernandes hian leia a tluk pahin Foden hi a lo chhir hmasa zawk tih hmuh theih a ni.

Professional Game Match Officials Limited (PGMOL) chief hlui leh FIFA referee lo ni tawh Keith Hackett chuan, he thil thlengah hian Fernandes pawh a chet dan avangin hremna pek ve ngei tur a nih thu a sawi chhuak a ni.

Hackett chuan Football Insider hnenah sawiin, "Thil ngaihnawm tak chu a ni. Man United player hian a tlem berah yellow card chu a hmu ngei tur a ni, a chhan chu a chet dan kha a fimkhur lo hle a ni.

"Chhir a ni miau a, chuvangin hremna a hmu ngei tur a ni ka ti bawk. Ka thawhpui ṭhenkhat phei chuan hnawhchhuah (red card) hial hmu tur a nih thu an sawi bawk a ni.

"Mahse red card aiin yellow card lama ka ṭan zawkna chhan chu, tha na lutuk a hman ka hre lo va, tualthah duhna emaw thil ṭha lo tak tih tumna rilru a awm ka rin chiah loh vang a ni. Keima mimal thlirna aṭanga ka hmuh dan chu a ni a, mahse referee-in yellow card a pe lo kha chu tihsual lian tak a ni chiang mai," tiin a sawi.

He thil thleng hnu lawk hian Manchester United defender hlui Gary Neville pawhin eng hremna mah Fernandes-a'n a pumpelh thei chu mak a tih thu a lo sawi ve bawk a ni.

United captain hlui Roy Keane pawhin half-time laiin he thil thleng hi sawiin, "Bruno-a'n a bawh a, a ti tlu a, a foul chiang hle a, chhuata a mut thlak pahin a pet zui bawk a nih kha. Foden a tho a, a chhanglet ve a, tichuan hnawhchhuah a ni ta der mai a ni.

"Khelmuala nungchang mawi lo leh tharum thawh (violent conduct) anga ngaih a nih ka ring a, mahse keima thlirna aṭang chuan helai hmuna tharum thawhtu zawk chu Bruno hi a ni. Ka sawi chhuah ngei a ngai a ni.

"Kum eng emaw zat liam ta khan Kyle Walker-a'n lu hmanga intauh (headbutt) anga insawia chhuata a tluk der ṭum [December 2024-a United striker Rasmus Hojlund hnawhchhuah a nih ṭum] pawh khan ka lo sawisel tawh a nih kha. Foden tan saw chu red card a tling ka ti miah lo," tiin a sawi.

Keane chuan sawi zawmin, "Referee hnenah hetiang thutlukna siam theihna chance a pe em tih kha a ni a. Foden a a tak a ni, mahse Bruno pawh chutiang tho chu a ni. Hemi avang hian Bruno hi hnawhchhuak ta se la, Foden chungah engmah thleng ta lo se, 'Bruno a a mang e, a ti mawl hle mai' kan ti leh tho ang.

"Player-te hi an zain PFA (Professional Footballers' Association) hnuaia awm vek an ni a, inzawmkhawmna pakhat hnuaia awm an ni; chuti chung chuan chhuatah let kual vel reng tur a ni lo. Walker-a chet dan kha kan hmu tawh a, Bruno pawhin hetiang dinhmunah hian puitling zawka a chet a ngai a ni. Boruak a sang a, match lian a ni an ti maithei, mahse mahni team-mate te mai bakah khingpui player-te pawh an inngaihsak tawn a ngai a ni. Foden-a hnawhchhuahna kha chu red card a tling lo ka ti tlat a ni," tiin a sawi belh bawk.