Carabao Cup-a Brighton laka an tlawm dan rapthlak tak hnuah, Manchester United head coach Michael Carrick chu a dinhmun a derthawng em tih zawh a ni a. Tun dinhmunah a hna chelh lai chu sawisel leh thlithlai mek ni mah se, Old Trafford-ah erawh manager thlak thut tumna a la awm lo.
United hian tun season match ruk an khelh tawhah vawi thum ngawt tlawmna an tawng tawh a. Nilaini zan khan 2-0 a hma an hruai hnuah Brighton lakah an tlawm zui leh a, hei hian Carrick-a hmabak chu sawi a ti-kai hle a ni. Mahse club chhungril lam thlirin buaina hi head coach thiam loh chauh a ni lo tih hriatna a lian hle.
Chief executive Omar Berrada leh director of football Jason Wilcox te chuan Carrick hi an la thlawp tlat a. Ruben Amorim pawh kum thar boruak chhiat tak hnuah hreh tak chungin an ban chauh a nih kha. Carrick hian Amorim-a neih ngai loh rinna leh duhsakna club hotute hnen aṭangin a la ngah hle zawk a ni. Kum 45 mi Carrick hian vanduaina a tawk bawk niin an ngai. Everton laka an chak dawn tawh nia a lan laiin Ainsley Maitland-Niles-a'n goal mak danglam tak a khung a, Manchester City an hmachhawn ṭum pawhin referee thutlukna siam sual avangin Pro Refs lamin darkar tlemte hnuah ngaihdam an dil hial a ni. Chu bakah nipui bazar chhung khan beisei angin squad an thuam chak tawk lo bawk.
Carrick-a mizia, thil harsa kara phili ve mai ngai lo leh tlawmna dahṭha thuai thei a nihna hi ama ṭhatna la ni reng mah se, tlarhnung lama a player-te zia erawh an club lenna leh buaina hian a delh rit hle tawh tih a lang a, result ṭha a neih thuai a ngai tawh hle a ni.
Co-owner Sir Jim Ratcliffe chu Brighton laka an khelh ṭum khan a inlan lo na a, derby match-ah erawh Avram Glazer nen an ṭhu dun a nih kha. Chutih laiin club ṭantuten hotu lu pahnihte dodalin khelmual pawnah lungawilohna an lantir a. Pathiannia Craven Cottage-a Fulham an hmachhawn hunah Ratcliffe hi a inlan dawn em tih chu hriat a chakawm hle. Ratcliffe hian thutlukna khauh tak a siam ngam ṭhin a, Dan Ashworth a ban tawh dan aṭang pawhin a huaisenzia a hriat theih. Chuvangin Fulham laka an inkhelh turah hian chak ngei chu Carrick-a tan a pawimawh zual hle ang.
Brighton laka an tlawm hnu khan Carrick chu a chauhin a rilru a na hle tih a hriat a, a hmelah beidawnna a lang chhuak hial a ni. Mahse, Carrick chuan mi dang kawk kual lovin mawhphurhna zawng zawng chu ama chungah a nghat vek a, club hmakhua a ngaih zia a tilang nawn leh a ni.
Chutih rualin kum 15 mi forward JJ Gabriel-a chungchang chu buaina dang a tling chho bawk. Gabriel hian club aṭanga a hming paih (de-register) a, chhuah a duh thu a thlen hnuah training a zawm duh lo va, hei hian Old Trafford chhungah buaina lian a thlen a ni. United lam chuan he ngenna hi an hnawlsak a, mahse October 6-a kum 16 a tlin hunah a pa Irish mi a nihna emaw, a nu Cyprus ram chhuak a nihna hmanga European Union passport lain club dang a zawm mai theih dan an chhui chiang mek a ni.
Gabriel leh a aiawhtute hian Zirtawpni khan Barcelona hotute nen inbiakna an nei a, Real Madrid pawhin an la ngaihven reng bawk. Mahse Gabriel-a tan hian tihsual lian tak pakhat a awm a: kar liam ta khan Leigh Sports Village-ah Sabah laka United team tana UEFA Youth League-ah a lo inlan hman tawh tlat a ni. UEFA Youth League danah chuan "player pakhat chu he inelna chhung hian club pakhat tan chiah a inlan thei" tih a nih avangin, Barcelona emaw Real Madrid emaw pawh zawm se, tun season chhung chu anni tan he inelnaah hian a khel ve thei tawh dawn lo a ni.
