Kar tawpa Fulham an hmachhawn turah Manchester United-in hnehna an chang a nih chuan, head coach Michael Carrick tan thawk la vawng vawng theihna hun remchang ṭha tak a ni dawn a ni.

Manchester United chuan 2026-27 Premier League season chu bul an ṭan ṭha lo hle a, league match li an khelh tawh aṭangin vawikhat chiah hnehna an la chang a. Chutih laiin kum 15 mi rawlthar JJ Gabriel-a'n Old Trafford chhuahsan a duh thu a sawi chhuah lehzel phei chuan club chhung boruak a tikhirh zual hle a ni.

He rawlthar theihna ngah tak chanchin a darh hnu lawk hian, Nilaini khan Carabao Cup-ah Brighton lakah an tla zui leh bawk a. Carrick-a dinhmun chungchangah sawiselna leh thlithlaina a nasat chhoh mek laiin, United lamin Gabriel-a thubuai an chinfel dan tur kawnga hma an lak dan erawh chuan manager hi a chhawk zangkhai ve thei thung ang.

Khelmuala Carrick-a squad thuamchak nan chanchin lawmawm hriat tur a awm chho bawk a, an player pawimawh tak pakhat chu squad-ah a rawn inlan leh thei hnai tawh dawn nia tarlan a ni.

JJ Gabriel-a dinhmun a la chiang lo:

Kum 15 mi Gabriel hian club-a a registration cancel (tihtawp) a duh thu United hotute a hriattir a, hei hian tun kar chhung khan ṭantute rilru a tibuai hle. He forward naupang theihna sang lutuk hian fak a hlawh em em a, season liam ta khan Under-18 Premier League Player of the Year chawimawina a lo dawng hial a ni.

United erawh chuan kum 11 mi a nih aṭanga an lo chhawr tawh Gabriel hi Old Trafford-a cham zui turin an la thlem thlu thei dawn tih beiseina an la nei tlat a. Fabrizio Romano-a tarlan danin, United hian pawisa hmang ringawta he buaina hi chinfel an tum dawn lo a ni.

Sum tam tak thehchhuah aiah, he rawlthar duhawm tak hi chelh zui theih nan Gabriel, a chhungte leh a aiawhtute nen inbiakna neih an tum zawk dawn a. United hian Gabriel-a registration tihtawp dilna hi hnawlsak emaw chona siamsak emaw theihna dan an nei bawk a ni.

Carlos Baleba a dam ṭha chho mek:

Brighton aṭanga £65million senga an lakluh Carlos Baleba pawh training-ah a kir leh tawh avangin, Fulham lakah a vawikhat nan United tan a inlan ve thei maithei dawn ta. Kum 22 mi Cameroon international hi pre-season laiin Brighton tan a kerek a tihhliam avangin Old Trafford a thlen hnuah a la inlan thei lo a ni.

The Athletic-in a tarlan danin, he Cameroon midfielder hi first-team match-ah a inlan theih a beiseiawm tawh hle a, mahse ṭantute erawh chuan inelna tak taka a khel lai hmu tur chuan thla thar thleng an nghah a la ngai deuh maithei bawk.

Club hotute chuan international break chhung hian Cameroon national team zawm tir lovin Carrington lama enkawl chhunzawm zawk an rilruk nia tarlan a ni. Baleba hi hun rei tak chhung United-in an lo thlithlai tawh a ni a, nakin zela an midfield tana innghahna lungpui pawimawh ber tur zinga mi atana ngaih a ni.