Manchester United defender hlui Marcos Rojo chu Argentina club Racing Club-ah training zawm duh lovin a hel mek a, kum 36 mi hian a naupan tet aṭanga a lo chawrchhuahna club Estudiantes pan a duh vang a ni. Thawhlehni khan Racing Club chairman leh Inter Milan striker hlui Diego Milito nen inbiakna an nei a, mahse an inkarah inhnialna nasa tak a chhuak a, club chhuahsan a duh thu a sawi hnuah club hotute nen an inrem theih tak loh avangin Rojo hian training zawm a hnawl zui ta hmak a ni.
Rojo hian a professional football hun Estudiantes-ah hian a ṭan a, kum 2009 khan Copa Libertadores leh 2010 khan Primera Division nomawite a lo lakpui tawh a ni. Russia rama hun reilote a hman hnuin Sporting CP a zawm a, 2014 World Cup-ah Argentina tana a khelh ṭhat em avangin Manchester United mit a la ta chat a. August 2014 khan manager Louis van Gaal chuan £16million sengin Old Trafford-ah a lalut a nih kha. United-ah hian season ruk leh a chanve awmin inelna hrang hrangah match 122 a khel a, FA Cup, League Cup leh Europa League nomawite a chawi hman a ni.
Kum 2021 khan Argentina-ah kirin Boca Juniors a zawm a, captain hial a nih hnuah August 2025 khan Racing hi a zawm leh a. Mahse Racing chu Copa Argentina aṭanga an tlak bakah league title lak an beiseina a tlahniam tial tial a, Rojo leh club hotute inkar boruak chu a rit chho ta hle a ni. Estudiantes-ah hian United star hlui Juan Sebastian Veron chu chairman a ni mek a, an club chhuak Rojo hi an beisei leh hle a ni. Kumin October 15-a Copa Libertadores semi-final-a Brazilian club Flamengo an hmachhawn turah Estudiantes centre-back pahnih an hrem avangin tlarhnung thuamchak an mamawh takzet a, CONMEBOL dan ang pawhin Rojo hi squad-ah an zep thei bawk a ni.
Kumin tawpa a contract tawp tur hi Racing hian an la titawp (terminate) lo a, a chhan chu a hlawh hi inkhelh zat azira pek (productivity clause) a nih avangin inkhel a hmaih chuan hlawh a hmu tlem dawn a ni. Rojo hi khelmual chhungah pawh buaina tawk fo mi a ni a, April thla khan River Plate an hneh loh ṭumin khingpui hmaia a hnek avangin hnawhchhuah a ni a, referee a ankhum zui avangin match li chhung hrem a tawk tawh bawk.
ESPN hnenah he defender luhlul tak hian a rilru a lo sawi chhuak tawh a: "Ka hrechiang hle a ni. Khawngaihthlak anga lan tum a, mi zawng zawngin min do anga sawi ka tum lo. Mahse chu chu thil awmdan a ni. Inkhel ṭha tak ka neih ṭumin tu mahin ka chanchin an sawi ngai lo.
"Mahse tihsual tenau te ka neih veleh, kar tluanin an sawi a, ka chet chhiat apiangin min dem rawn ṭhin. A ninawmin rilru a nghawng ve thei hle a ni. Ka thil duh ber chu football khelh a ni.
"Ka career pumah hian jersey engpawh ha mah ila hetiang hi ka ni reng ṭhin. Ka theihna zawng zawng leh ka neih zawng zawng sengin ka bei ṭhin. Tihsual ka nei tawh ngei a, tihsual ka la nei zel bawk ang.
"Mahse ka club aiawh tana theih tawp chhuah hi ka tum reng ṭhin a ni. Ka teammate-te chhan nana referee biak emaw, mi dang nena innawr buai emaw a ngai a nih pawhin ka ti zel ang; chutiang chu ka khelh dan leh football ka hriatthiam dan a ni tlat," tiin a lo sawi tawh a ni.
