Manchester United-in mahni mual Old Trafford-ah Bournemouth 3-0 a an hneh loh hnuah, club legend Gary Neville chuan an executive-te leh hotu lute chu an tlin loh lutuk avangin a sawisel hle.

Bournemouth an tlawm hnu hian head coach Michael Carrick chu an ban thuai tura ngaih a ni a, he thutlukna siamtu tur technical director Jason Wilcox leh chief executive Omar Berrada-te hian hetiang dinhmun hi chelh tlak an nih loh thu Neville-a'n a sawichhuak a ni.

United hi tun season Premier League match riat khelh tawhah point sarih chauh hmuin 16-na dinhmunah an awm mek a, August thla aṭangin league match-ah chak an la nei miah lo a ni. Carabao Cup aṭang pawhin an tla tawh bawk.

Neville chuan a podcast-ah sawiin, "Jason Wilcox hi he dinhmun chelh tur hi a la ni lo. Wilcox hi academy director background aṭanga rawn chhuak niin, sporting director hnuaia technical director hna chelh mek a ni a. Mahse, thawklehkhatarah khawvela football club lian berte zinga mi decision-maker lian ber a rawn ni ta thut a ni. A aia tawk lo leh a hun hmaa nawr luh a ni zawk.

"Omar Berrada pawh football club-a CEO dinhmun la chelh ngai reng reng lo a ni. Chuvang chuan an mawhphurhna chelh mekah hian tawnhriat an tlachham em em a, hei hian an chungah nghawng thalo a rawn thlen mek a ni," tiin a sawi.

Berrada leh Wilcox te hi Sir Jim Ratcliffe-a ruat an ni a, ban thei tu pawh a ni. Mahse, tun dinhmunah chuan Ratcliffe-a hian an pahnih hian ban a tum lo ni hian hriat a ni.

Manager chang nilovin club hotu lute pawhin mawh an phurh thu sawiin Neville chuan, Sir Alex Ferguson-a chhuah hnua United hotute thil tihsual tawhte a sawichhuak a. Owner Glazer chhungkuate pawh a sawisel a ni.

Neville chuan, "Michael Carrick-a'n khelmuala player awm zawng zawng kha a lalut vek hleinem. Chu chu Carrick-a hna a ni lo. Tunge recruitment hotu ber? Tunge sporting director? Manager thlak leh tawh tur a nih ang bawk hian an ni pahnih hi hmun ruakah an awm tur a ni lo a, an lamah mit a fuk thup a ngai tawh a ni.

"Tun hnaiah vawi thum ngawt thutlukna dik lo an siam tawh a. Hemi hma phei chuan Glazer chhungkuain vawi li emaw vawi nga emaw an lo tisual tawh bawk. Kum 10 chhung zet sporting director pawh an nei lo a, hei hi thil pawi tak a ni. Kum rei tak chhung chu he club hi tlinna nei lo ten an lo enkawl tawh a ni," tiin a sawi zui a ni.